Governu presiza rezolve preokupasaun DTP-DSMKRN Bobonaro
MALIANA, 13 setembru 2023 (TATOLI) – Membru Parlamentu Nasionál, Deputadu António Verdiál de Sousa, husu ba IX Governu rezolve lalais preokupasaun ne’ebé Diresaun Terra no Propriedade (DTP) no Diresaun Servisu Munisipál Korservatóriu Rejistu Notariádu (DSMKRN) Munisípiu Bobonaro hasoru durante ne’e.
Deputadu António Verdiál hato’o rekomendasaun ne’e bainhira ho membru deputau sira hosi komisaun A sira halo enkontru fiskalizaaun ho autoridade munisípiu Bobonaro, diretór delegasaun teritoriál no diretór servisu munisipál sira.
“Horisehik lokraik kuandu to’o mai rai Bobonaro, ami direitamente ba notariadu no terra propriedade, ha’u haree sira-nia kondisaun ne’e presiza tebes tau-matan, ami tama diretór sira dehan karreta laiha, delegasaun territoriál rua ne’e hasoru problema kuaze atu hanesan,” nia hateten iha salaun administrasaun munisipál, kuarta ne’e.
Diretór Delegasaun Teritoriál Terra no Propriedades Munisipiu Bobonaro, Castro Laco Martins, justifika tinan barak hasoru problema kona-bá transporte, menus rekursu umanu liuliu kondisaun fasilidade servisu nian.
“Ha’u hanoin señór deputádu sira tenke moe, tanba imi haree komputadór no printer ne’e tempu UNTAET nian, ita print ba mós la sai ona, ha’u mai sateia tékniku iha munisípiu nian, ba mós loron rua tolu nia la simu ona tanba komputadór avansadu, halo favór kuandu ami-nia ministériu tau osan ba, labele cut (labele halo redusaun), hare di’diak,” nia aprezenta.
Diretór DSMKRN Munisípiu Bobonaro, Deolindo dos Santos, hateten, maske durante ne’e diresaun refere kontribui reseita ba kofre estadu kada trimestre, maibé aprovasaun OJE kada tinan governu la tau prioridade atu rezolve problema sira hanesan fasilidade servisu, ekipamentu liuliu transporte.
“Ami-nia transporte laiha, lalika karreta, lalika motorizada, rejistu notariadu munisipiu Bobonaro sepeda dayung de’it mós laiha, atu hodi halo servisu atende komunidade sira,” nia katak.
Diretór ne’e dehan, problema no difikuldade hirak-ne’e DSMKRN munisípiu Bobonaro labele rezolve tanba durante ne’e Ministériu Justisa aloka orsamentu kada trimeste rihun $1 de’it.
“Ita labele halo buat ida, oinsá atu atende ita-nia populasaun munisípiu Bobonaro ho númeru ne’ebé boot, sá tán atu halo atendimentu ba to’o postu administrativu sira,” nia hateten.
Enkuantu durante enkontru, dirijente hosi diresaun rua ne’e entrega mós dokumentu eskrita ba Komisaun A atu levanta ba Governu liuhosi plenária iha Uma Fukun Parlamentu Nasionál.
Notísia relevante: DTP Bobonaro kontribui reseita rihun $20 iha trimestre dahuluk
Jornalista : Sérgio da Cruz
Editór : Evaristo Soares Martins
