OÉ-CUSSE, 14 setembru 2023 (TATOLI – Durante tinan sia (9), hahú hosi 2015 to’o 2023 ne’e, Autoridade Rejiaun Administrativa Espesiál Oé-Cusse Ambeno (RAEOA), rekolla ona reseita doméstika hamutuk $46,183,066,72.
Notísia relevante: RAEOA propoin millaun $127 inklui millaun $14 finaliza Ró Haksolok
Adjunta Prezidente Autoridade RAEOA ba asuntu Reforsu Institusionál, Leónia da Costa Monteiro, informa, atu aumenta reseita liuhosi efisiénsia no efikasia, boot-liu iha kobransa fiskál, identifika no regula poténsia sira-ne’ebé iha ba reseita no hadi’a kapasidade instituisaun públika nian objetivu atu halo kolesaun reseita.
“Hosi 2015 to’o tinan ne’e, RAEOA rekolla ona reseita hamutuk $46,183,066,72, mai hosi reseita fiskál $18,346,179.01, reseita naun-fiskál $8,227,306.16, reseita RAEOA $18,647,069.95, reseita Fundu Espesiál Dezenvolvimentu (FED) rihun $962,511.60,” Leónia Monteiro, aprezenta ba membru Parlamentu Nasionál (PN) Komisaun C trata asuntu ba Finansa Públika bainhira hala’o fiskalizasaun iha Oé-Cusse, kinta ne’e.
Nia informa, iha artigu 8 alinea A, prevista kona-ba Dekretu-Lei númeru 5/2015, loron 22 fulan janeiru, segundu alterasaun Dekretu-Lei numeru 93/2022, loron 22 fulan dezembru, estatutu RAEOA, reseita kobransa iha RAEOA nian.
Nune’e konsidera reseita própria RAEOA nian, sei halo ajustamentu ba orsamentu pakote fiskál Orsamentu Jerál Estadu (OJE) RAEOA nian, nunee molok fahe pakote fiskál sei halo redusaun ba reseita nian.
“Reseita haat ne’e, reseita própria RAEOA ninian mak saida, billete aviaun ZEESM, sansaun ka multa sira-ne’ebé alfándega hala’o, osan sira-ne’e hela ba kofre RAEOA la submete ba nasionál,” nia katak.
Nune’e mós kona-bá reseita naun-fiskál ho reseita fiskál sira-ne’e, mai hosi impostu, ezemplu 10%, ba saláriu no vensimentu funsionáriu sira-nian, reseita 2% hosi kompañia sira-ne’ebé maka hala’o konstrusaun iha Oé-Cusse, no 4% hosi konsultor sira-ne’ebé maka halo fiskalizasaun ba grande mega projetu ZEESM.
“Osan sira-ne’ebé tama reseita, maka agora daudaun tinan sia nia laran ne’e, ita iha ona millaun $46-resin ne’e ($46,183,066,72),” nia katak.
Notísia relevante:Infografia: OJE 2023, RAEOA ezekuta ona 30,83%
Jornalista : Abílio Elo Nini
Editór : Evaristo Soares Martins
