ME: investimentu iha edukasaun implika mudansa iha sistema ensinu
DILI, 14 setembru 2023 (TATOLI) – Ministériu Edukasaun (ME) diksute programa prioridade ba dezenvolvimentu edukativu iha 2024 no foku prinsipál ba tinan oin mak investe iha sistema ensinu hodi lori progresu iha setór ne’e.
“Ami-nian prioridade ba tinan oin mak foku liu ba dezenvolvimentu edukasaun iha nivel eskolaridade hanesan ensinu pré-eskolár, báziku, sekundáriu jerál no tékniku vokasionál”, Ministra Edukasaun, Dulce de Jesus, hatete iha salaun Delta Nova, ohin.
Atu edukasaun formál ne’e hetan nia kualidade, governante ne’e dehan importante liu mak hadi’ak sistema, nune’e bainhira programa ne’e implementa ona iha tinan oin bele lori edukasaun ida di’ak ba labarik sira.
“Ita presiza hadi’ak kualidade profesór sira liuhusi formasaun adekuada, presiza apoia materiál didátiku ba eskola sira, hadi’ak kurríkulu no tenke halo avaliasaun beibeik ba implementasaun sistema hodi bele haree nia progresu iha kada nivel eskolaridade”, afirma.
Liuhusi enkontru ne’ebé Ministériu Edukasaun realiza, entre loron 14 no 15, dirijente sira diskute atu hatuur planu ho kualidade, nune’e bele garante edukasaun iha Timor-Leste.
“Programa sira ne’ebé maka ami halo sei aprezenta ba parseiru sira iha aban, nune’e sira mós bele prienxe apoiu saida maka atu fó ba ministériu no ita bele define katak programa ida ne’ebé maka parseiru sira tulun no programa saida maka ita uza orsamentu 2024 nian”, governante ne’e hatete.
Tuir Dulce de Jesus, Governu iha kompromisu ida hodi tau prioridade ba edukasaun ne’e ho konfiansa tomak katak sei ezekuta ho kualidade.
Diretora-Jerál Administrasaun no Finansa, Cecília Belo de Assis, hatete dirijente Edukasaun sira simu ona orientasaun atu halo planu 2024 nian bazeia ba programa Governu nian.
“Tanba pakote fiskál ne’e rasik seidauk determina ho montante hira, maibé Ministériu Edukasaun hahú halo ona ezersísiu ida ne’e hodi bele halo ona preparasaun atu halo aprezentasaun tuirmai. Ami sei atribui formuláriu ba dirijente sira no sei orienta husi espesialista timoroan sira iha ministériu nian laran, nune’e bele halo planu ida kualidade atu garante dezenvolvimentu edukasaun nian ba futuru”, realsa.
Tuir dokumentu ofisiál, prioridade Governu ba tinan 2024 iha setór edukativu ida mak inisia kriasaun Centro Aprendizagem e Formação Escolar (CAFE) iha nível postu administrativu sira.
Jornalista: Tomé Amado
Editora: Maria Auxiliadora
