Membru F-FDTL envolve kazu iha Liquiça hein prosesu justisa
DILI, 14 setembru 2023 (TATOLI) – Xefe Estadu Maiór Forsa Armada Tenente Jenerál Domingos Raul ‘’Falur Rate Laek’’, dehan membru F-FDTL ho insiál Edc ne’ebé envolve kazu tiru sidadaun ida iha Munisípiu Liquiça foin lalais ne’e, iha hela sela detensaun Unidade Polísia Militár, Kintál Boot, hodi hein prosesu justisa.
Nia dehan, membru refere sei iha hela sela detensaun Polísia Militár atu kumpre sansaun disipliñar ne’ebé Komandu F-FDTL sei aplika ba nia relativa ho nia atitude.
“Sim, membru ne’e sei detein iha sela Polísia Militár. Ida ne’e nu’udar faze primeiru ne’ebé mak komandu aplika mak sansaun disipliñar no agora membru ne’e sei iha hela prosesu disipliñar hodi hein prosesu justisa tuir mai, atu bele haree gravidade, karik membru ne’e nia aktus ne’e halai ba krime, entaun ne’e ita haruka ba justisa, sé nia sala, prontu haruka niaba hatán prosesu judisiál, tanba ita seidauk iha Tribunál Militár”, Falur hateten ba jornalista sira iha Unidade Polísia Militár Kintál Boot, kinta ne’e.
Falur esplika, kuandu prosesu judisíal ba membru ne’e seidauk konklui mak membru ne’e sei kontinua detein hela iha sela detensaun unidade Polísia Militár.
“Sim, kuandu membru ne’e Tribunál bolu ona hodi nia hatán ona iha Tribunál mak kondena ona nia katak kastigu, ida ne’e mak mak ita bolu justisa”, nia haktuir.
Antes ne’e, Komandu F-FDTL liuhosi Unidade Polísia Militar (PM) detein ona membru F-FDTL na’in-haat ne’ebé envolve iha kazu tiru kanek joven ida, Silvio da Costa Araújo ho idade 15, área Kalora, Aldeia Leopa, Suku Dato, Postu Administrativu Liquiça Vila, Munisípiu Liquiça.
Kazu ne’e akontese tanba deskonfia oknum F-FDTL tiru joven ida naran Silvio da Costa Araújo tanba mosu konfrontu entre joven ho joven iha festa halo tinan, depois membru F-FDTL ho inisiál EdC tama iha festa ne’e hodi buka joven sira ne’ebé envolve iha konfrontu ne’e, depois joven sira tuku kona membru F-FDTL inisiál EdC rezulta kanek matan.
Ho nune’e, membru F-FDTL inisiál EdC iha postu bolu nia kolega sira atu hakalma situasaun refere, maibé derepente de’it kilat mós tarutu, tanba membru F-FDTL inisiál EdC kanek no rezulta joven ida kanek.
Enkuantu, joven na’in-rua ne’ebé kanek, dadaun ne’e, halo hela tratamentu iha Óspitál Nasionál Guidu Valadares (HNGV).
Jornalista: Natalino Costa
Editór : Zezito Silva
