iklan

DEFEZA, HEADLINE

Membru PM foun 36 tuir formasaun Operasaun Maubere VII

Membru PM foun 36 tuir formasaun Operasaun Maubere VII

Xefe Estadu-Maiór Jenerál F-FDTL, Tenente-Jenerál Falur Rate Laek, vizita Polisia Militar (PM) sira tuir formasaun Maubere-7, iha kuartel Polísia Militar, Qintal Boot Dili, Kinta (14/09). Imajen Tatoli/Francisco Sony

DILI, 14 setembru 2023 (TATOLI) – Membru Polísia Militár foun na’in 36 hahú tuir  formasaun Operasaun Maubere VII 2023.

Formasaun Operasaun Maubere VII nu’udar rekezitu ida ba membru Polísia Militár foun, atu kumpre sai Polísia Militár loloos hodi halo servisu iha Unidade Polísia Militár.

Membru na’in 36 ne’ebé mak tuir formasaun Operasaun Maubere VII mai hosi kompontente  tolu no unidade sira iha Instituisaun F-FDTL.

Formasaun ne’e durante fulan tolu no aprende siklista militár, seguransa pesoál, batedór inklui seguransa ba alta entidade sira.

Tenente Koronél Abel da Costa ‘Niky’ husu ba membru PM 36 atu tuir formasaun ne’e ho di’ak.

“Imi tenke tuir formasaun ne’e ho di’ak no durante formasaun tenke hatudu disipliña, pontualidade no tenke hatudu espiritu kamaradajen”,  Tenente Koronél  Abel da Costa iha nia intervensaun durante abertura formasaun Operasaun Maubere VII iha kuartel Unidade Polísia Militár Kintál Boot, kinta ne’e.

Niky agradese ba militár Brazil ne’ebé halo kooperasaun militár Timor-Leste hodi bele tulun ona militár F-FDTL liuliu dezenvolvimentu F-FDTL.

Iha fatin hanesan, Xefe Estadu Maiór Jenerál Forsa Armda, Tenente Jenerál Domingos Raúl ‘Falur Rate Laek’ husu ba militár 36 ne’ebé tuir formasaun Operasaun Maubere VII durante formasaun presiza aprende atu adapta hodi implementa tuir padraun sosiadade Timór nian.

Tanba kareira Polísia Militar presiza dedikasaun no auto sakrifísiu barak atu bele kumpre misaun hodi defende sosiedade ida ne’ebé pasífika, maske iha risku ba vida.

Reprezentante Embaixadór Brazil, Rita de Cássia Lott Marques, hateten relasaun Brazil ho Timor-Leste desde uluk, fó tulun Timor-Leste iha área edukasaun no area seluk.

“Kooperasaun ne’e to’o mai formasaun Operasaun Maubere VII, nune’e, Governu Brazil kontinua hametin kooperasaun sira ne’e”, nia dehan.

Jornalista: Natalino Costa    

Editór : Zezito Silva

iklan
iklan

Leave a Reply

iklan
error: Content is protected !!