ERMERA, 14 setembru 2023 (TATOLI) – Ministru Juventude Desportu Arte no Kultura (MJDAK) Nélio Isaac Sarmento, hateten ba mandatu ida ne’e, Governu hanoin ona atu fó formasaun ne’ebé kualidade ba joven-sira hamutuk ho igreja katólika.
“Governu ida-ne’e iha ona hanoin atu fó formasaun ho kualidade ba joven-sira hamutuk ho igreja katólika liuhosi nota konseitu ne’ebé ami aprezenta ba konferénsia episkopál Timor-Leste liuhosi Komisaun Nasionál Juventude Katóliku Timor-Leste (KNJTL)”, Nélio dehan iha Letefoho, kinta ne’e.
Objetivu prinsipál hosi programa ne’ebé sei hala’o mak hamosu karatér joven-sira nian hosi hahalok violentu ba hahalok domin hodi aposta ba kontribuisaun dezenvolvimentu nasaun nian.
Nia husu ba Eminénsia Dom Virgílio Cardeal do Carmo da Silva, Bispu Dioseze Maliana Dom Norberto Amaral no Bispu Dioseze Baucau Dom Leando atu reza ba Governu ida ne’e ho hanoin di’ak hotu atu halo ba Timor-Leste.
“Ami husu ba Amu Bispu na’in-rua no amu Cardeal atu reza mai hanoin sira hotu ne’ebé Governu iha atu tulun dezenvolvimentu ne’ebé di’ak ba Timor-Leste”, nia hakotu.
Jornalista: Hortencio Sanchez
Editór : Zezito Silva
