MALIANA,14 setembru 2023 (TATOLI)-Segundu Vise Prezidente Parlamentu Nasionál, Alexandrino Afonso Nunes, preokupa ho funsionamentu merkadu rua iha kapitál Maliana munisípiu Bobonaro la funsiona hafoin governu konstrui pakote merkadu rua ne’e desde tinan 2019.
“Ita iha merkadu rua hanesan Mau-mali no Soso, agora ne’e oinsá? tanba ha’u haree ne’e seidauk la’o,” nia dehan bainhira hamutuk ho Komisaun A PN ne’ebé trata asuntu Justisa no Konstituisionál halo enkontru fiskalizasaun no Autoridade Munisípiu Bobonaro no kargu xefia sira iha edifísiu administrasaun munisipál Bobonaro, kuarta ne’e.
Notísia Relevante:Negosiante Maliana husu tetu didi’ak bazár movel iha merkadu Mau-Mali no Soso
Merkadu rua ne’e governu konstrui iha tinan 2019 ida mak merkadu Maumali, lokaliza iha aldeia Samelau, suku Ritabou, negosiante abandona durante tinan ida ona hafóin akontese kazu ofensa integridade agravadu ne’ebé hamate matebian Costódio Fátima iha fulan-juñu iha tinan 2021.
Nune’e mos merkadu Soso, lokaliza iha suku Holsa, dezde konstrusaun remata to’o agora negosiante sira seidauk utiliza hodi halo atividade negósiu tanba kestaun distánsia dook hosi kapitál Maliana, merkadu rua ne’e governu anteriór konstrui pakote ida de’it dezde 2019.
Deputadu Komisaun A ne’e mós preukupa kona-ba kondisaun estázionamentu antigu iha aréa Tunubibi ne’ebé lokáliza iha suku Tapo-Memo, postu administrativu Maliana ne’ebé la funsiona tanba kondisaun infraestrutura aat daudauk.
“Terminál ida ne’e mós bele sai terminál internasionál tanba kuandu buat ne’e loos ona bele mós hetan reseita hosi ida ne’e, agora oinsá munisípiu nia hanoin ba oin,” dehan Alexandrino.
Hatán ba preokupasaun ne’e, Prezidente Autoridade Munisípiu Bobonaro, Ernesto de Oliveira Barreto, informa merkadu rua ne’e sei funsiona hafoin halo manutensaun ba ninia infraestrutura sira.
“Tinan ne’e agora konstrusaun parese ke la’o ona, fura bee moos antes atu uza primeiru tenke kria kondisaun tanba lorloron ema 500 ou 600 ba bazár bee laiha mós susar,”Nia hateten.
Antes ne’e, Autoridade Munisípiu Bobonaro halo ona enkontru ho entidade relevantes sira atu oinsá re-ativa merkadu Mau-mali iha kada loron sesta.
Maibé antes re-ativa, nia dehan Autoridade Munisípiu sei konstrui tan moru iha merkadu Mau-mali iha tinan oin tanba mós tau ona iha planu asaun anuál 2024.
“Ita halo hanesan para lokoraik tuku 06 resin, negosiante sira fila hotu no labele bá toba iha ne’ebá oan bei-oan ba hotu ne’e la di’ak,” Nia argumenta.
Kona-ba kondisaun Terminál Tunubibi, Prezidente Autoridade Munisípiu Bobonaro ne’e, hateten iha hela diskusaun ho Konsellu Koordenasaun Munisipál.
“Diskusaun ne’e sei la simu malu nafatin, ida hakarak terminál iha Tunubibi, seluk fali hakarak terminál iha Mau-mali, ami sei diskute hela tanba estrada ida hodi Soso ba Kampu Aviasaun ne’e la jadi, entaun ami-nia hanoin se atu kria rua jalur liu hosi Tunubibi mai Halecou, mai Mau-mali, kampu aviasaun, aman ne’e laiha ganti rugi rai fuik hotu,”Prezidente autoridade haktuir.
Notísia Relevante:Parte hotu hetan rendimentu bainhira reativa merkadu rua iha Maliana
Jornalista: Sergio da Cruz
Editór: Agapito dos Santos
