DILI, 15 setembru 2023 (TATOLI)—Conselho de Imprensa Timor-Leste (CI), sesta ne’e, realiza formasaun ba jornalista hamutuk na’in 10-resin hosi órgaun komunikasaun sosiál iha Timor-Leste ho tópiku “Reportajen balansu no kredivel iha ámbitu eleisaun suku 2023”.
Jornalista partisipa iha formasaun ne’e maiória mai hosi mídia sira-ne’ebé rejista iha CI hanesan mídia online, jornál, televizaun no rádiu ne’ebé kompostu hosi Agência Tatoli, Timor Post, Dili Post, Indepedente, Radiu RTK, STL no seluk tan.
“Formasaun ne’e durante loron ida tomak. Programa formasaun ba jornalista ida ohin ne’e ba eleisaun suku. Ita hatene besik daudaun ona, entaun papél jornalista importante tebes halo kobertura ba prosesu eleisaun sira hahú hosi inísiu kampaña to’o eleisaun,” Membru Conselho de Imprensa, Francisco Belo Simoes da Costa, hateten ba jornalista sira iha edifísiu Conselho de Imprensa (CI), Quintal Boot, Dili.
Baze ba eleisaun sira Prezidensiál no Parlamentár tinan kotuk, nia dehan, buat ne’ebé Conselho de Imprensa nota mak maiória mídia no jornalista sira sei komete infrasaun étika iha ámbitu kobertura eleisaun nian.
Nune’e, razaun ba Conselho de Imprensa atu hanoin oinsá mak kontinua fó formasaun eleva koñesimentu jornalista sira-nian atu oinsá bele halo kobertura ida balansu no tuir prinsípiu kódigu étika jornalismu atu evita infrasaun sira-ne’ebé antes ne’e iha.
“Conselho Imprensa liuhosi dirasaun analiza mídia fasilita formasaun ba jornalista sira hosi órgaun komunikasaun sosiál, oinsá prepara jornalista sira bele halo kobertura ho di’ak iha ámbitu eleisaun suku ne’ebé atu mai,” nia hateten.
Formasaun ne’e, CI hala’o kooperasaun ho Komisaun Nasionál Eleisaun (CNE, siglá portugés) no Sekretaridu Tékniku Administrasaun Eleitorál (STAE) nu’udar formadór hodi fó formasaun mateira sira-ne’ebé iha relasaun ho CNE no STAE nia kompeténsia rasik iha ámbitu eleisaun suku.
Diretór Nasionál Edukasaun Sívika no Formasaun asuntu Partidu Polítika, Mídia no Komunikasaun hosi CNE, Carlos Alves Lopes, konsidera mídia nia papél importante tebes tanba ne’e ohin ko’alia ho jornalista sira hanoin la’ós iha formasaun ne’e nia laran de’it mak hatene, maibé hafoin ne’e eleitór sira hotu iha territóriu laran sei hatene hotu ona tanba nia parte ko’alia ona ho mídia.
Jornalista Timor Post, Jaime Pires, hakarak agradese ba Conselho de Imprensa bele realiza ona formasaun refere kapasita jornalista sira hodi bele hala’o kobertura di’ak liután iha eleisaun suku mai.
Enkuantu, iha formasaun ne’e oradór hosi CNE aprezenta matéria importánsia eleisaun suku ba sidadaun sira, oradór STAE aprezenta matéria prosesu no implementasaun eleisaun suku ba sidadaun sira, no oradór hosi CI aprezenta matéria papél mídia iha eleisaun suku no kódigu étika jornalizmu.
Jornalista : Nelson de Sousa
Editór : Cancio Ximenes
