Top

Governu presiza indika rai konstrui edifísiu foun PN

Prezidente Parlamentu Nasionál, Maria Fernanda Lay. Imajen Tatoli/Francisco Sony.

DILI, 15 setembru 2023 (TATOLI)—Prezidente Parlamentu Nasionál, Maria Fernanda Lay, husu Governu atu indika rai hodi konstrui edifísiu foun Parlamentu Nasionál (PN).

“Iha hanoin, tanba hakarak ka lakohi atu serbisu presiza fatin. Primeiru rai tenke iha, rai laiha sei ba halo iha ne’ebé maibé serbisu tenke halo nafatin,” nia hateten ba jornalista sira iha uma fukun PN, sesta ne’e. 

Nia parte lahatene prosesu sira liu ba iha Governu anteriór kona-ba atu atribui rai ka lae, maibé ba oin sei ko’alia ho IX Governu atu bele buka solusaun. 

Sekretáriu Jerál Adjuntu Parlamentu Nasionál, João Rui Amaral, hateten to’o oras ne’e estudu viabilidade ba konstrusaun edifísiu foun Parlamentu Nasionál (PN) seidauk bele realiza tanba seidauk iha rai fiksu ne’ebé Governu atu atribui.

“Parlamentu ami aloka hela iha orsamentu privativu atu halo estudu viabilidade, depois iha fundu infraestrutura ninian PN tau iha ne’eba millaun $1-resin, maibé to’o agora ami labele ba foti, tanba buat hotu tenke liuhosi estudu viabilidade mak ita bele hala’o. Nune’e, estudu viabilidade ne’e ita bele konkretiza kuantu mais iha terrenu ne’ebé mak fiksu mak ita foin halo no agora seidauk iha terrenu fiksu,” nia hateten.

 

Nia hateten, hanoin atu harii edifísiu foun PN hosi kedas lejislatura sira liubá maibé la konsege no to’o lejislatura dalimak tau ona orsamentu atu halo estudu viabilidade no konstrusaun ne’ebé hein Governu indika rai.

 

Nia dehan, uluk iha Tasi-Tolu mós ita haree hotu ona no iha lejislatura daruak konsege duni halo estudu viabilidade maibé depois polítika iha lejislatura tuir mai muda fila-fali.

 

“Ne’ebé, to’o ohin loron, natoon iha Caicoli rezolusaun sai tiha ne’e mós Governu la fó, ikus mai hatudu fila-fali iha Halidolar ba iha ne’eba mós dehan atu muda fali ba sidade administrativa iha Metinaro, entaun to’o ohin loron la klaru liu,” nia hateten.

 

PN iha lejislatura dalimak esforsu tebes tenta komunika ho entidade relevante, inklui pedidu lubun hato’o ba Governu maibé to’o mandate VIII Governu KOnstitusionál ramata seidauk hetan fali resposta.

 

Jornalista : Nelson de Sousa

 

Editór       : Cancio Ximenes

Publisidade

Leave a Reply

Latest Post

error: Content is protected !!