OÉ-CUSSE, 15 setembru 2023 (TATOLI – Prezidente Komisaun C, hosi Parlamentu Nasioná (PN) trata asuntu Finansa Públiku, Deputada Cedelizia dos Santos, promete sei ko’alia ho Governu atu altera lei kona-bá insentivu ba xefe suku sira nune’e bele simu kada fulan, tanba durante tinan barak, xefe suku sira fulan tolu mak foin simu dala ida.
Eis Sekretária Jerál Parlamentu Nasionál ne’e, hato’o nia promesa ne’e bainhira hala’o enkontru iha salaun administrasaun Numbei, Oé-Cusse, kinta ne’e.
“Kona-bá subsísiu ba xefe suku sira, ohin ha’u rona, kada fulan tolu mak foin simu dala ida, hakarak simu fulan-fulan, ha’u haree asuntu ne’e iha ligasaun mós ba ita-nia parte legál ruma presiza altera, entaun ida-ne’e ami sei haree fila-fali, iha IX Governu ida-ne’e, bele altera tiha lei ida-ne’e hodi fó fali ba ita-boot sira,” Deputada Cedelizia dos Santos hateten hosi responde preokupasaun xefe suku sira.
“Ha’u hanoin kuandu fulan tolu mak ita simu, ida-ne’e kleur demais, ita hotu iha preokupasaun, ida-ne’e Komisaun C ami tau konsiderasaun ba ida-ne’e, ami sei ko’alia ho Governu atu ita bele altera lei ida-ne’e, nune’e ba futuru xefe suku sira simu subsídiu kada fulan,” nia katak.
Purtantu, xefe suku Costa, Aleixo de Jesus, hateten, kuandu fulan tolu maka simu dala ida, nee di’ak, maibé nesesidade família presiza tebes.
“Entaun dalaruma, ami ba foti de’it ka impresta iha seluk, tanba bainhira mak fulan tolu atu simu, entaun bainhira simu, osan balu fó hotu ba ema ne’ebé ita impresta, nune’e liuhosi prezensa komisaun C, husu atu hato’o ba Governu, atu hadi’a tiha lei kona-bá subsídiu ba xefe suku sira,” nia husu.
Jornalista: Abílio Elo Nini
Editór: Evaristo Soares Martins
