DILI, 15 setembru 2023 (TATOLI) – Ró Barbetu Manu Koko ne’ebé sosa husi Ministériu Edukasaun ho osan rihun $142 lahalo ona operasaun, entre Dili no Ataúru, durante tinan neen tanba avaria. Nune’e, ministériu hakarak halo manutensaun atubele funsiona fali ró ne’e.
Ministériu halo akizisaun ba ró ne’e iha 2016 ho objetivu mak atu tula estudante sira tékniku vokasionál bá-mai Dili no Ataúru. Maibé, hafoin halo operasaun tinan ida de’it, iha 2017, ró avaria. Nune’e, iha 2018, lahalo movimentasaun to’o ohin loron.
Haree ba kestaun ne’e, Sekretáriu Estadu Edukasaun Ensinu Sekundáriu ba Eskola Téknika, Domingos Lopes Lemos, no Diretór Nasionál Tékniku Vokasionál no Lojístika, Fernando Gama, halo observasaun direta ba ró ne’ebé paradu de’it iha tasi laran iha área Licidere nian.
Sekretáriu Estadu ne’e lembra katak, iha mandatu VIII Governu nian, Ministériu Edukasaun, Juventude no Desportu tenta ona halo pedidu ba manutensaun ró Barbetu Manu Koko, maibé iha kestaun balun mak impede hela prosesu ne’e entaun la konsege halo manutensaun.
Ministériu Edukasaun daudaun haree oinsá maka bele halo manutensaun tanba ró ne’e nia mákina balun la funsiona ona no estudante sira husi eskola tékniku vokasionál labele uza hodi halo atividade ka viajen bá-mai Ataúru.
Iha sorin seluk, tékniku ba ró Berbetu Manu Koko, Domingos de Araújo, lembra katak, ró ne’e halo operasaun to’o de’it iha 20 outubru 2017 hodi lori estudante bá Atauru, depois liu tiha ida ne’e laiha ona.
Iha tinan neen nia laran parte tékniku sira halo de’it kontrolu ba ró talin atu asegura katak labele kotu, maibé daudaun ró ne’e komesa ku’ak ona. Berbetu Manu Koko agora sei iha hela tasi laran parte Unidade Polísia Marítima nian no iha tempu besik sei dada sa’e mai rai-maran hodi halo manutensaun.
Jornalista: Tomé Amado
Editora: Maria Auxiliadora
