DILI, 15 setembru 2023 (TATOLI) – Ministra Edukasaun, Dulce de Jesus, despede estudante na’in-hitu ne’ebé sei kontinua estudu iha Portugál durante tinan hitu nia laran.
Governante ne’e husu alunu sira atu haka’as aan hodi estuda, tanba bolsa ne’ebé maka hetan ne’e la’ós mai husi Governu, maibé ne’e mai husi investimentu boot inan-aman sira-nian.
“Kuidadu imi-nian aan no proteje aan nafatin, tanba imi maka sei sai futuru ba rai Timór ne’e. Objetivu imi bá iha Portugál mak estuda. Ne’e duni, hatudu imi-nia aan hanesan timoroan ida ne’ebé bá ho misaun ida no sei filafali mai lori misaun ne’e hodi hato’o saida maka imi hetan iha Portugál”, ministra hameno.
Governante ne’e fiar katak estudante na’in-hitu iha ona preparasaun ida di’ak, maske ministériu la akompaña sira-nian progresu maibé fiar katak buat ne’ebé maka Fundasaun Klibur Institute of Business (IOB) halo ba estudante sira ne’e sei hatudu rezultadu di’ak.
Joven sira ne’e antes arranka ba Portugál partisipa uluk iha formasaun língua portugeza husi Fundasaun Klibur IOB durante fulan neen nia laran.
Auxiliadora Madeira, estudante husi Centros de Aprendizagem e Formação Escolar (CAFE) Ermera ne’ebé sei bá Portugál ne’e agredese ba Fundasaun Klibur tanba nia hetan oportunidade kontinua nia ensinu sekundáriu to’o remata universidade iha nasaun ne’e.
Benefisiáriu na’in-hitu ne’e – haat husi Eskola Canossa, ida husi São José Externato, ida CAFE Ermera no seluk husi Eskola Cristal.
Durante sira-nian estadia iha nasaun refere, ba kustu moris nian sei responsabiliza husi inan-aman sira no ba estudu sei apoia husi parseiru. Kada fulan ema ida sei simu $350 husi eskola ne’ebé sira estuda ba. Alunu ida sei hala’o estudu iha Eskola Prifisionál Prátika Universál (EPPU) Bragansa no neen iha Eskola Profisionál Ekonomia Sosiál (EPES) Portu.
Auxiliadora promete katak sei kumpre nia misaun nu’udar estudante no sei fó nia tempu tomak ba estuda no bainhira filafali mai bele kontribui ba dezenvolvimentu nasaun ida ne’e nian.
Reprezentante Fundasaun Klibur IOB, Alexandre Lay, konfesa katak estudante sira ne’ebé sei arranka bá Portugál iha semana oin ne’e tuir ona formasaun língua no aprende ona kultura nasaun ne’e nian, nune’e bele adapta-aan ho di’ak liután.
Nia mós relata katak joven hamutuk 100-resin husi Fundasaun Klibur IOB nian mahan maka eskola ona iha Portugál. Esforsu ne’ebé Fundasaun halo ba timoroan sira atu hetan fatin bá eskola iha Portugál maka kria kooperasaun ho eskola sekundária no universidade sira iha país refere.
Fundasaun mós koloka ona nia reprezentante ida iha Portugál hodi bele halo koordenasaun, komunikasaun no kontinua asegura estudante timoroan sira bainhira enfrenta problema ruma.
“Ita-nian enkarregadu iha Portugál ne’e, ita fihir ema ne’ebé iha kapasidade no iha abilidade adekuada hodi bele kria nafatin komunikasaun di’ak ho estudante sira”, afirma.
Jornalista: Tomé Amado
Editora: Maria Auxiliadora
