DILI, 16 setembru 2023 (TATOLI)—Tribunál Judiál Primeiru Instánsia Dili, sábadu ne’e, hasai despaixu hodi aplika medida koasaun prizaun preventiva ba arguidu AMV, ne’ebé bosok ema iha facebook.
Ministériu Públiku liuhosi Prokuradór, António Tavares promove arguidu ho krime burla agravadu, nune’e liuhosi Juiz turnu, Afonso Carmona hasai despaixu ikus hodi asegura arguidu labele halo lakon prova sira.
“Depois de primeira interogatóriu horiseik no rezultadu ohin hasai, Tribunál aplika medida koasaun prizaun preventiva ba arguidu tanba nia temi ema balun nia naran durante interrogatóriu dahuluk, nune’e Ministériu Públiku no Polísia buka tuir. Entaun nia (arguidu) tenke iha prizaun para Ministeriú Públiku no Polísia aban bainrua kontinua halo investigasaun hotu lai mak ita foin husu fali medida koasaun,” Defensór Públiku, Marçal Marsquerinhas hateten iha Tribunál Distritál Dili.
Nia dehan, bainhira arguidu iha li’ur, nia bele kontaktu ema ne’ebé envolve kazu ne’e hodi halai ses, entaun Tribunál tenke aplika medida koasaun prizaun preventiva hodi asegura nia, nune’e Ministériu Públiku no Polísia buka tuir prova seluk, liu-liu sira ne’ebé sei iha telefone laran hanesan foto tanba iha ema barak mak sai vítima.
“Se nia iha li’ur karik, nia bele perturba halai ses, tanba feto ida hamutuk ho nia, Ministériu Públiku no Polísia agora buka tuir hela,” nia akresenta.
Notísia relevante : PNTL detein timoroan ida servisu ho Indonéziu bosok ema iha rede sosiál
Nu’udar Defensór ba arguidu, Marçal Marsquerinhas aseita ho desizaun Tribunál ba ninia kliente tanba nu’udar meiu ida atu asegura tanba bainhira arguidu iha li’ur, nia vida iha perigu nia laran.
“Ba Defeza importante liu mak nia seguransa. Bainhira nia iha li’ur ema sira ne’ebé mak sai vítima ba nia hahalok bele oho nia, di’ak liu nia ba iha prizaun preventiva, asegura nia iha kadeia laran, aban bainrua bainhira prosesu la’o, desizaun ba Tribunál sala mak dehan sala, agora ita respeitu ba prezunsaun inosénsia, katak nia la sala maibé hakarak kumpre prizaun preventiva tanba parte vítima hetan ameasa,” Defensór tenik.
Evidénsia hanesan vítima iha Koreia barak mak manda osan $300 inklui ema boot balun tan, tanba ne’e arguidu tenke iha prizaun preventiva atu nune’e investigasaun bele la’o ho di’ak.
Hafoin Tribunál hasai desizaun, parte Departementu Investigasaun Kriminál (DIK) nasionál lori kedan arguidu AMV ba Prizaun Becora hodi kumpre despaixu Tribunál.
Antes ne’e, DIK nasionál Komandu Jerál detein Arguidu AMV ho fragrante delitu iha kuarta (13/9) tanba deskonfia envolve iha kazu burla agravadu, furtu agravadu no Cyber Crime.
AMV serbisu hamutuk ho sidadaun Indonéziu feto ho inisiál S, nune’e liuhosi meiu rede sosiál facebook no whatsaap, feto ne’e husu atu namora ho ema, ikus nia husu ema manda vídeo molik ba nia, nune’e bainhira nia hetan ona vídio ka imajen ruma, nia manda tutan fali ba AMV atu ameasa ema, bainhira la fó osan maka sei publika ema nia vídeo ka imajen molik iha facebook.
Vitíma sira tauk hodi haruka osan ba AMV ho totál $1.000. Nune’e, vítima balun hato’o keixa iha parte DIK nasionál iha tersa (12/9) lorokraik meizumenus tuku 15:00 no halo kedan detensaun ba AMP iha fatin transaksaun osan Western Union iha Timor Plaza.
Bainhira ekipa DIK nasionál detein AMV lori kedan ba Komandu Jerál PNTL hodi submete ba prosesu investigasaun.
Durante prosesu investigasaun, PNTL rekolla evidénsia osan hamutuk $1.000 ne’ebé mak AMV hamutuk ho sidadaun Indonéziu hetan hosi vítima sira liga ho atividade krime ne’e rasik.
Jornalista : Natalino Costa
Editora : Julia Chatarina
