iklan

INTERNASIONÁL, DILI, HEADLINE

EU hakarak apoiu Governu iha aréa seguransa no protesaun sivíl

EU hakarak apoiu Governu iha aréa seguransa no protesaun sivíl

Embaixadór Uniaun Europeia (UE), iha Timor-Leste, Marc Fiedrich, hasoru malu ho Ministru Interiór (MI), Francisco da Costa Guterres. Imajen/media MI

DILI, 18 setembru 2023 (TATOLI)-Embaixadór Uniaun Europeia (UE), iha Timor-Leste, Marc Fiedrich, hateten Uniaun Europeia iha kompromisu atu apoiu Governu liuliu Ministériu Interiór (MI) hodi dezenvolve aréa seguransa no protesaun sivíl.

Marc Fiedrich, hato’o asuntu ne’e, durante halo enkontru ho Ministru Interiór (MI), Francisco da Costa Guterres, segunda ne’e, hodi koa’lia kona-ba  programa no kooperasaun servisu ne’ebé maka parte rua sei implementa iha mandatu governu tinan 5 hahú 2023 to’o 2028.

Notísia Relevante :Uniaun Europeia apoia PNTL kombate krime bazeia ba jéneru

“Vizita ida-ne’e atu atualiza progresu servisu ne’ebé mak Uniau Europeia hala’o ona ho governu anteriór no mós ami hakarak rona ideia hosi Ministru Interiór nian kona-ba planu sira iha futuru nune’e bele hametin liután kooperasaun di’ak iha aréa ne’ebé ami deside ona liu-liu iha aréa seguransa no mós aréa protesaun sivil nian,”nia hateten liuhosi komunikadu imprensa ne’ebé maka Agência TATOLI asesu, segunda ne’e.

Iha tempu hanesan Ministru Interiór, Francisco da Costa Guterres, apresia no elojia ba servisu sira ne’ebé mak Uniaun Europeia oferese ona durante ne’e hodi dezenvolve área prioridade Governu nian liu-liu ida aréa seguransa no protesaun sivíl.

Governante ne’e dehan sorumutu ne’e mós parte ida atu hametin liután lasu amizade entre nasaun rua, nune’e bele aselera prosesu dezenvolvimentu nasaun nian.

“Ohin ita mós introdúz polítika no programa prioridade Ministériu Interiór nian, hodi embaixadór Uniaun Europa mós bele apar, nune’e bainhira parte Uniaun Europa foti desizaun ruma tuir prioridade ne’ebé planeia ona, nune’e husi embaixadór mós iha kompromisu bo’ot atu hakle’an liután kooperasaun ho Timor-Leste no re-afirma solidariedade no fraternidade ho povu no Estadu Timor-Leste nian,” dehan Ministru Francisco.

Nia hateten lori Governu Konstitusionál dasia nia naran hakarak agradese ua’in ba Uniaun Europeia ne’ebé maka durante ne’e pro-ativu tebes ba dezenvolvimentu Timor-Leste iha setór oioin.

“Hodi Governu nia naran agradese ba tulun tomak ne’ebé iha ha’u mós hakarak fó apresiasaun ba programa foun ne’ebé ohin ita ko’alia hamutuk ona, no ita fó prontidaun hodi serbisu hamutuk mantein relasaun ne’ebé forte entre Uniaun Europeia ho Timor-Leste iha aréa seluktán hodi hadia ita-nia rai di’ak liután,” nia dehan.

Entertantu, Uniaun Europeia fó apoiu  ba dezenvolvimentu iha Timor-Leste durante ne’e, konsentra ba área nutrisaun, kombate deflorestasaun, agrikultura, kombate korrupsaun, hadi’ak finansas públikas, Parlamentu Nasionál, Tribunal Rekursu, boa governasaun, diversifikasaun ekonómiku no desentralizasaun.

Alende ne’e, apoiu mós Polisia Nasionál Timor-Leste liuliu kombate krime baseia ba jéneru, apoiu iha eleisaun sira, formasaun rekursu umanu, apoiu Ministériu Justisa kona-ba ekipamentu emisaun Billete Identidade (BI) no seluk tan.

Notísia Relevante :Uniaun Europeia Apoia Millaun $10 Ba Ministériu Saúde

Jornalista: Hortencio Sanchez

Editór        : Agapito dos Santos

iklan
iklan

Leave a Reply

iklan
error: Content is protected !!