Governu distribui materiál konstrusaun ba vítima dezatre naturál iha Covalima
COVALIMA, 18 setembru 2023 (TATOLI)–Governu Liuhosi Sekretária Estadu Protesaun Sivil hamutuk ho Autoridade Covalima, segunda ne’e, distribui materiál konstrusaun ba vítima dezastre naturál iha Munisípiu Covalima.
“Ha’u hakarak hateten ita-boot sira-ne’ebé simu materiál tenke halo kontrusaun fali uma no labele faan sasán, tanba ita-boot sira vítima duni ba dezastre naturál no merese atu hetan no simu osan labele uza hodi halo fetosan-umane, maibé atu responde nesesidade,” Xefe Ekipa distribuisaun materiál konstrusaun Autoridade Protesaun Sivíl (APC-sigla portugés) Nasionál, Celestina de Brito Matos, hateten molok distribui materiál konstrusaun iha Kampu Ladi, Covalima.
Governu distribui materiál konstrusaun ba vítima-sira tenke halo konstrusaun uma iha fatin ne’ebé seguru atu labele akontese tan dezastre natural, nune’e bele fó biban ba vítima dezastre sira seluk ne’ebé seidauk simu.
Tuir loloos, nia dehan, Governu lori materiál rekuperasaun ba to’o iha postu administrative sira, tanba iha lei protesaun sivíl artigu 7, iha orsamentu atu transporta materiál rekoperasaun ba vítima Dezastre naturál maibé agora konsentra de’it iha munisípiu hafoin materiál rekuperasaun tula fali ba ida-idak nia postu.
Aleinde materiál konstrusaun fó apoiu orsamentu tuir katégoria hanesan tipu dezastre uma aat totál apoiu osan mão de obra $1000, aat kmaan ne’e $750 no aat natoon ne’e ho osan hamutuk $600.
Sekretáriu Munisípiu Covalima, Francisco de Jesus Alves, hateten Governu distribui materiál rekuperasaun vítima dezastre naturál ba tinan 2022 to’o tinan 2023 bazeia ba verifikasaun hosi ekipa tékniku vítima sira merese atu hetan apoiu materiál rekuperasaun.
“Sekretáriu Estadu Portesaun Sivíl mai iha Autoridade Protesaun Sivíl (APC-sigla portugés) no servisu munisipál jestaun Dezastre no protesaun sivíl halo identifikasaun ita boot sira merese atu hetan apoiu materiál rekuperasaun no subsídiu mão de obra vítima 2022 to’o 2023,” nia dehan.
Vítima dezasre naturál ne’ebé simu materiál rekuperasaun antes ne’e, Autoridade Protesaun Sivíl (APC, sigla portugés) fó ona apoia emérjensia no ohin foin simu materiál konstrusaun.
Autoridade Covalima iha mós servisu responzabiliza direta ba dezastre naturál, tuir dekretu-lei númeru 3/2016 ho artigu 16 fó kompeténsia ba administrasaun munisípiu Covalima hodi halo identifikasaun ba vítima dezastre naturál.
Autoridade Covalima husu vítima atu uza didi’ak materiál reuoperasaun no subsídiu ne’ebé hosi Governu tenke konstrui uma no labele faan no uza osan la tuir matadalan ne’ebé iha.
Komandante Autoridade Protesaun Sivíl (APC), Inpestór Xefe Flavio Mendes, reforsa Governu apoiu materiál konstrusaun ba vítima dezastre naturál tinan 2022 to’o 2023 ne’ebé rejista xefe família hamutuk 168, no hosi númeru ne’e xefe família 57 hetan ona apoiu materiál konstrusaun falta subsídiu.
Tuir oráriu Autoridade Protesaun Sivíl distribui materiál konstrusaun durante loron rua mak hanesan iha segunda (18 setembru 2023) distribui materiál konstrusaun no subsídiu ba vítima dezastre ho totál xefe família 38 iha postu administrativu Fatululik, Fatumea, Maucatar, Tilomar no Suai.
Vítima dezastre naturál ne’ebé simu materiál konstrusaun ne’e ho katégoria hanesan uma aat kmaan hamutuk xefe família 21, uma aat naton iha xefe fmília hitu (7) no uma ne’e heatn estragu ho siyasaun aat totál ne’e hamutuk uma 10.
Tuir planu, iha tersa (19 setembru 2023) sei entrega subsidíu ba vítima dezasre naturál ho tipu rai halai iha suku Zulo, postu administrativu Zumalai, munisípiu Covalima.
Jornalista : Celestina Teles
Editór : Cancio Ximenes
