DILI, 09 setembru 2023 (TATOLI)— Polisia Nasionál Timor-Leste (PNTL), detein ona suspeitu ne’ebé nu’udar mós membru autoridade seguransa hosi Batallão Ordem Pública (BOP) ho inisiál DJ tanba tiru joven ida ho naran Julivio Pereira Bruno Pinto, ho pistola iha área Bidau-Akadiru-Hun, Suku Bidau Lecidere, Postu Cristo Rei, Munisípiu Dili.
Portavós Komandu Jerál PNTL, Superintendente Polísia António da Luz, konta nia kronolójia katak akontesimentu ne’e iha loron domingo (17/9), tuku 3:00, madrugada, hafoin grupu joven sira ne’e halibur malu hodi halo barullu iha bairru laran hahú iha sábadu (16/09), tuku 10:00, kalan.
Nune’e, suspeitu ne’e sente katak joven sira ne’e halo barullu ka pertuba duni ema nia deskansa, entaun nia nia ba fó hatene joven sira ne’e. maibé, vítima ne’e hamri’ik insulta kedas ba membru PNTL refere no hakat atu baku tán membru PNTL refere.
“Membru ne’e (suspeitu) halo asaun primeiru tiru pistola sa’e ba leten, maibé vítima Julivio Pereira Brunu kontinua hakat mai besik suspeitu atu halo asaun baku, nune’e suspeitu tiru vitima nia ain tur iha parte loos”, relata Portavóz ne’e, ba jornalista sira iha Komandu Jerál PNTL Caicoli, segunda ne’e.
Hafoin suspeitu tiru joven ne’e, nia afirma PNTL liuhosi Departementu Investigasaun Kriminál tuun ba tereñu hodi asegura ho detein suspeitu ne’e iha sela Komandu PNTL Díli. durante oras 72 hodi enkamiña prosesu ba Ministériu Públiku (MP) atu prosesa ba Tribunál.
Tuir nian, iha atuasaun membru PNTL dala ruma bele prejudika nian, maibé nia defende nia aan hodi uza duni arma hodi tiru.
“Maibé ita sei haree, tanba iha servisu balun dala ruma arma ne’e atribui ba sira. Ha’u hanoin katak ita tenke ko’alia buat ne’ebé mak tuir base legál ne’ebé mak iha. Situasaun balun sé dala ruma iha situasaun perigu, entaun ne’e hanesan meus ida ne’ebé uza hodi defende ita nian aan,” nia afirma.
Kazu krime ne’e PNTL rejista ho númeru NUC 0256/2023-PNSIK. Prosesu investigasaun entrega ona ba Departementu Investigasaun Kriminál atu prosesa kazu ne’e liuliu oinsá atu uza armas ne’e ho di’ak labele hakanek sidadaun ida.
Daudaun ne’e, Vítima Julivio Pereira Bruno Pinto halo hela tratamentu iha Hospitál Nasionál Guidu Valadares, kuandu hotu ona tratamentu Departementu Investigasaun Kriminál sei foti dadus ka informasaun kompleta prosesu investigasaun.
Hatán kona-ba vítima ho suspeitu iha relasaun família, Portavós Komandu Jerál ne’e hateten, depende ba prosesu investigasaun mak bele esklarese. Maibé tuir informasaun ne’ebé mak iha katak sira viziñu, atu relasaun família ka lae relasaun prosesu investigasaun mak sei hatene.
Vida ameasadu membru PNTL bele tiru
Iha biban ketak, Diretór Fundasaun Mahein (FM), Nelson Belo, hateten, bainhira membru PNTL halo atuasaun mak suspeitu ida tenta atu oho nia, mak lei fó dalan membru PNTL uza ultimu rekursu hodi tiru ema nune’e salva nia hosi ameasa.
“Kuandu membru PNTL ida halo atuaasaun iha tereñu mak haree ba situasaun la permite ona no laiha ona aproximasaun entre membru PNTL ho suspeitu. Suspeitu mós uza forsa hakat mai hodi oho ita membru PNTL, entaun oknum PNTL ne’e bele utiliza forsa hanesan rekursu ikus liu no bele tiru nia ain tohar,” defende Diretór FM ne’e.
FM nia haree ba prosedimentu utilizasaun arma basea ba dekretu-lei númeru 43/2011, rejime juridiku ne’ebé fó ida dalan atu uza forsa ka tiru hanesan ultima rekursu.
Maske nune’e, Diretór FM ne’e husu ba PNTL atu kontinua hala’o investigasaun ho profisionál ba kazu tiru joven iha Bidau.
“Atuasaun PNTL ne’e mak tuir duni lei ne’e sei la kontra Direitu Umanu. Maibé ne’e atu viola ka la viola ne’e tenke mós liuhosi investigasaun mak foin hatene,” katak nia.
Jornalista: Natalino Costa
Editór : Florencio Miranda Ximenes
