DILI, 18 setembru 2023 (TATOLI)- Portavós Komandu Jerál Polísia Nasionál Timor-Leste (PNTL), Superintendente Polísia António da Luz, informa, kontinua hein mandadu judisiál atu buka tuir tán suspeita insiál S ne’ebé envolve kazu Cyber Crime hodi lohi ema liuhosi rede sosiál ka facebook.
Hafoin, Tribunál aplika tiha medida koasaun Prizaun Preventiva ba arguidu AMV, maibé iha prosesu ida ne’e seidauk hotu tanba arguidu rasik temi suspeitu ho inisiál S durante interogátoriu dahuluk.
“Hosi parte investigasaun hala ona nian kna’ar submete kazu krime bromin ne’e ba Ministériu Públiku no iha arguidu ida mak Tribunál aplika medida koasaun prizaun preventiva, maibé ba kazu ne’e ninian investigasaun sei kontinua ba oin,” dehan Portavós António da Luz ba jornalista sira iha Komandu Jerál PNTL Caicoli, segunda ne’e.
Nune’e, nia dehan hein hela mandadu detensaun hosi Ministériu Públiku hodi fasilita PNTL buka tuir autór seluk ne’ebé komete kazu krime ne’e.
Ho kazu ne’e, Superintendente Polísia ne’e husu ba sidadun atu tau atensaun didi’ak ba atividade online ne’ebé mak bele estraga sira nian vida liuliu ema la ho resposabilidade bele aproveita oportunidade ne’e atu hetan benefisiu.
“Husu ema hotu la’os joven de’it katuas no ferik sidadaun hotu-hotu atu bele fó atensaun, liuliu ba ema ne’ebé ita la koñese, di’ak liu lalika la’o tuir ka halo tuir sira nia hakarak tanba buat sira ne’e liga fali ba morál no mós prejudika mentalidade ita nian”, nia fó hanoin.
Molok ne’e, Departementu Investigasaun Kriminál (DIK) Nasionál Komandu Jerál detein ho fraglánte delito ba arguido AMV tanba deskonfia envolve kazu burla agravadu, furtu agravadu no ida tán bolu brooming.
Suspeitu servisu hamutuk ho sidadaun Indonézia feto ho inisiál S liuhosi meus rede sosiál ka facebook mak feto ne’e husu atu namora ema iha facebook no WhatsApp.
Liuhosi rede sosiál, suspeitu sira husu ema atu manda nia video aat ka la ho ropa ba nian. Nune’e bainhira ema halo video ba sidadaun estratejiru Indonézia ne’e nia manda tutan fali ba suspeitu AMV atu ameasa ema kuadu la fó osan ba sira (supsitu) mak sei públika video ne’e iha facebook.
Nune’e mak vitíma sira tauk hodi haruka osan ba suspeitu , kuanze osan ne’ebé suspeitu sira rekolla hosi atividade ne’e hamutuk $1.0000.
Ho nune’e, mak vítima balun ba keixa iha parte Departementu Investigasaun Kriminál Nasionál (DIKN), iha tersa (12/9) horiseik lokoraik maizumenus tuku 15:00, lokoraik halo detensaun ba suspeitu AMP tanba ba fati osan iha Wester Union Timor Plaza nian.
Notísia relevante: Tribunál aplika prizaun preventiva ba arguidu AMV bosok ema iha facebook
Jornalista: Natalino Costa
Editór : Florencio Miranda Ximenes
