MALIANA, 19 setembru 2023 (TATOLI) — Xefe Sentru Dezenvolvimentu Emprezariál (CDE, sigla portugés) munisípiu Bobonaro, Elias Cardoso, husu joven sira-ne’ebé la kontinua estudu atu prepara-aan, kria atividade ruma hodi kompete iha Kompetisaun Planu Negósiu Inovativu (KPNI) tinan 2024.
Nia avalia durante ne’e iha joven barak mak ativu partisipa programa ne’e, maibé barak mak la hetan informasaun liuliu sira-ne’ebé iha postu administrativu sira.
“Karik IADE loke oportunidade ba ba (KPNI) ka Fasilidade Inovasaun Negósiu (FIN) ita-boot sira bele partisipa hotu, oinsá ho ita nia kapasidade no koñesimentu atu kria rasik kampu traballu ba ita-nia no mós ba maluk sira-ne’ebé hakarak servisu hamutuk ho ita,” nia informa ba Tatoli iha kna’ar fatin, segunda ne’e.
Tuir Elias, ema-ne’ebé maka kontinua estudu iha nível universidade mós nia rezultadu ikus sei fila mai servisu.
Nia reforsa, la signifika servisu ne’e refere de’it ba ema funsionáriu, Polísia, F-FDTL, maibé kualkér atividade saida mak ita halo ne’e mak hanaran servisu, liuhosi kapasidade no koñesimentu ema idak-idak nian.
Elias Cardoso, fó ezemplu konkreta ida mak emaprezaria Bobonaro oan ida mós konsege sai vensedór iha KPNI 2022 ne’ebé hetan osan ho valór $4000 liuhosi idea negósiu iha área turizmu kulturál.
“Ita bele dehan nia bele motiva ona, emprezariu seluk no joven sira, atu nune’e sira bele partisipa karik iha eventu tuir mai, tanba KPNI ne’e tinan-tinan sempre realiza,” nia katak.
Alende ne’e liuhosi Programa Fasilidade Inovasaun Negósiu (FIN) joven na’in-rua iha Maliana mós hetan apoia orsamentu kauze besik rihun $2 hodi loke atividade negósiu hanesan kafetaria no hakiák manu-lokál.
Programa refere implementa ho objetivu atu fó oportunidade ba joven empregadór sira atubele asesu apoia formasaun no kapasitasaun inklui ekipamentu hodi dezenvolve atividade negósiu ne’ebé inísia ona liuliu hasa’e rendimentu no kria kampu serbisu.
Kompetisaun negósiu refere foka ba setór sira hanesan turizmu, komérsiu, indústria, agrikultura no pekuária.
“Ninia vantajen maka karik ita hetan ona apoia, ita hetan buat ne’ebé ita hakarak ho gratuita, hodi dezenvolve liután ita-nia atividade,” nia akresenta.
Enkuantu partisipante KPNI munisipiu Bobonaro tinan 2023 hamutuk na’in-24, hosi númeru ne’e na’in-ualu de’it mak konsege aprezenta proposta, maibé la rezulta ema ida hakat ba nasionál hodi tuir kompetisaun KPNI.
Jornalista: Sérgio da Cruz
Editór: Evaristo Soares Martins
