DILI, 19 setembru 2023 (TATOLI)—Deputadu hosi bankada parlamentár iha Parlamentu Nasionál maiória prienxe ona formuláriu ba deklarasaun rikusoin iha Tribunál Rekursu (TR).
Deputadu FRETILIN, Joaquim dos Santos, hateten nia-parte nu’udar Deputadu ne’ebé re-eleitu, inklui Deputadu seluk FRETILIN nian iha lejislatura daneen halo ona deklarasaun rikusoin hodi kumpre ba prazu ne’ebé iha tuir lei Medida Kombate Korrupsaun (MPCC, siglá portugés).
“H’au halo tiha ona, ne’e obrigasaun tinan-tinan hahú mandatu halo no depois mandatu liu tiha tinan ida halo atualizasaun. Ne’ebé, Deputadu Fretilin halo hotu tiha ona no balun foin semana kotuk, se la hotu sansaun kona koima,” nia hateten ba Agência Tatoli iha uma fukun PN, tersa ne’e
Xefe bankada CNRT, Deputadu Duarte Nunes, hateten Deputadu CNRT hotu-hotu aprezenta ona deklarasaun rikusoin ba iha Tribunál Rekursu.
Vise bankada PLP, Deputadu Abel Freitas, dehan prazu aprezentasaun iha 15 setembru, maibé momentu ne’e nia-parte hala’o hela fiskalizasaun iha munisípiu nune’e hosi Deputadu PLP agora ida mak prienxe daudaun hodi submete ona iha horisehik, ne’ebé kompleta ona Deputadu hosi PLP hotu.
Tanba razaun foin hetan informasaun hosi meza iha semana ida no bainhira hetan hala’o hela fiskalizasaun iha baze.
Antes ne’e, Prezidente Parlamentu Nasionál, Maria Fernanda Lay, bolu atensaun ba bankada parlamentár sira atu haree ida-idak nia Deputadu deklara rikusoin ba Tribunál Rekursu (TR), tanba prazu ramata ona iha loron 15 setembru ne’e.
“Ida-ne’e, ohin, ha’u bolu atensaun ba bankada, tanba iha akollamentu matéria ida tenke haree mak deklarasaun de beins, tanba tuir lei ne’ebé ami Parlamentu mak aprova. Agora ita hakilar, hanoin ita tenke halo tuir lei ne’ebé ita aprova, hakarak altera iha futuru ita bele altera tanba bainhira iha inisiativa lei ne’e tama vigora, ita hanoin laiha kondisaun atu bele halo prosesu,” Prezidente PN ne’e hateten ba jornalista sira hafoin reuniaun líder bankada iha PN, sesta ne’e.
Nia la esplika, dadaun ne’e Deputadu iha lejislatura daneen ne’e na’in hira mak prienxe ona deklara rikuosin, tanba ladún lembra.
“Ha’u lahatene, tanba ohin bolu atensaun kolaborasaun bankada ida-idak para haree nia Deputadu, tanba momentu ha’u fila (hosi rai-li’ur) sira hotu-hotu dehan seidauk, labele ansi lai. Ha’u dehan hosi akollamentu to’o agora, Deputadu sira fó prioridade liu ba fiskalizasaun lahatene ba saida, ami hein relatóriu,” nia dehan.
Tuir lei Medida Prevensaun Kombate Korrupsaun (MPKK) bainhira Deputadu sira la kumpre hala’o deklarasaun rikusoin mak sei iha sansaun.
“Ha’u fiar Prezidente Tribunál Rekursu hato’o ona iha intervensaun katak, bainhira laiha deklarasaun beins iha sansaun finanseiru ne’ebé Deputadu mós tenke selu, iha lejislatura anteriór iha, ne’ebé la’ós novidade foun,” nia dehan.
Jornalista : Nelson de Sousa
Editór : Cancio Ximenes
