Governu hala’o pagamentu Bolsa da Mãe Jerasaun Foun faze daruak iha Covalima

COVALIMA, 19 setembru 2023 (TATOLI)–Ministériu Solidariedade Sosiál no Inkluzaun (MSSI) liuhosi Sentru Solidariedade Sosiál no Inkluzaun (CSSI, sigla portugés) halo ona pagamentu ba benefisiáriu Bolsa da Mãe Jersaun foun faze daruak iha Covalima.

“Agora daudaun prosesu pagamentu ba benefisiáriu bolsa da mãe jerasaun foun faze daruak hala’o ona pagamentu iha sentru saúde no postu saúde ne’ebé estabelese iha munisípiu Covalima,” Pontu Fokál Bolsa da Mãe Jerasaun foun Nelson de Jesus, hateten ba Agência Tatoli  iha nia kna’ar fatin Suai Loro, tersa ne’e.

Pagamentu bolsa da Mãe Jerasaun foun hala’o hosi fulan-abríl to’o juñu, no sei kontinua mós pagamentu ba benefisiáriu ne’ebé iha fulan-marsu seidauk simu sira-nia direitu.

Dadus ne’ebé pontu fokál fó sai katak pagamentu ba benefisiáriu bolsa da mãe jerasaun foun iha munisípiu Covalima iha postu administrativu hitu (7) ne’e benefisiáriu hamutuk 4880, ho totál orsamentu hamutuk $298.180.00.

Tuir oráriu ne’ebé Agência Tatoli asesu, Governu hahú halo pagamentu faze daruak ba benefisiáriu iha Covalima, iha postu administrativu Suai, iha nia sentru saúde ida (1) no postu saúde ualu (8) ne’ebé hahú halo pagamentu iha segunda (04 setembru) no finaliza iha iha loron kinta (07 setembru) ho totál benefisiáriu hamutuk 1,901.

Postu administrativu Maucatar, iha sentru saúde ida (1) no postu saúde rua (2), hahú halo  pagamentu iha segunda (11 setembru) no konklui iha tersa (12 setembru), ho totál benefisiáriu hamutuk 647.

Ih postu administrativu Tilomar, iha sentru saúde ida (1) no postu saúde haat (4) ne’ebé hahú pagamentu iha kuarta (13 setembru) to’o sesta (15 setembru) ho benefisiáriu hamutuk 667.

Iha postu administrativu Zumalai, iha sentru saúde ida (1) mo postu saúde lima (5) ne’ebé hahú halo pagamentu iha segunda (18 setembru) to’o kuarta (20 setembru) ho benefisiáriu hamutuk 1,127.

Iha postu administrativu Fohorem, iha sentru saúde ida (1) no postu saúde tolu (3) ne’ebé hahú halo pagamentu iha kinta (21 setembru) to’o sesta (22 setembru) ho benefisiáriu hamutuk 315.

Iha postu administrativu Fatumea, iha sentru saúde ida (1) no postu saúde rua (2) ne’ebé hahú pagamentu segunda (25 setembru) to’o remata ho nia benefisiáriu hamutuk 272.

Iha postu administrativu Fatululik, iha sentru saúde ida (1) ho nia postu saúde ida (1) ne’ebé hahú halo pagamentu durante loron ida-ne’ebé hahú iha tersa (26 setembru) to’o ramata.

Jornalista : Celestina Teles

Editór       : Cancio Ximenes