DILI, 19 setembru 2023 (TATOLI)—Governu liuhosi reuniaun Konsellu Ministru, aprova projetu dekretu-lei, ne’ebé aprezenta hosi Ministru Administrasaun Estatál, Tomas do Rosário Cabral, kona-ba alterasaun datoluk ba dekretu-lei númeru 6/2014, loron 26 fevereiru, kona-ba rekursu materiál no insentivu finanseiru ba líder komunitáriu no kria servisu administrasaun suku nian.
“Ho intervensaun normativa ida-ne’e, halo kriasaun servisu administrasaun suku hanesan servisu administrativu apoiu ba xefe suku no haforsa valór subvensaun públika hosi Estadu ba xefe suku sira ba finansiamentu despeza sira ne’ebé relasiona ho pagamentu remunerasaun rekursu umanu sira ne’ebé presta atividade iha servisu administrasaun suku nian ne’ebé kria agora,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu, tersa ne’e.
Notísia relevante : MF realiza pagamentu insentivu suku ba munisípiu haat inklui RAEOA
Diploma ne’e halo mós armonizasaun ba redasaun ho dekretu-lei númeru 49/2023 no permite pagamentu ajuda kustu ba líder komunitáriu sira bainhira hirak ne’e mobiliza ona hosi administrasaun sentrál Estadu, direta ka indireta nian hodi partisipa iha atividade ne’ebé organiza no hala’o ona hosi órgaun no servisu sira ne’e.
Servisu administrasaun suku kompostu hosi sekretáriu administrasaun, ofisiál administrasaun, ofisiál finansa no ofisiál asuntu sosiál. Sekretáriu administrasaun suku responsável ba diresaun no supervizaun ba atividade sira ne’ebé hala’o hosi ofisiál administrasaun, finansa no asuntu sosiál sira hodi garante katak sira halo tuir instrusaun no orientasaun xefe suku no hetan remunerasaun mensál hamutuk $170.
Enkuantu, ofisiál administrasaun suku responsável ba prestasaun apoiu xefe suku kona-ba administrasaun no espediente jerál tuir orientasaun sekretáriu administrasaun suku, ne’ebé hetan remunerasaun mensál hamutuk $150.
Ofisiál finansa suku responsável ba prestasaun apoiu ba xefe suku kona-ba jestaun finansa suku nian tuir orientasaun sekretáriu administrasaun suku no hetan remunerasaun mensál hamutuk $150, ofisiál asuntu sosiál suku responsável ba prestasaun apoiu ba xefe suku kona-ba asuntu sosiál suku, tuir orientasaun sekretáriu administrasaun suku no hetan remunerasaun mensál hamutuk $150.
Jornalista : Antónia Gusmão
Editora : Julia Chatarina
