Kongregasaun SSPS-SVD koordena Autoridade harii sentru formasaun iha Pante Makasar
OÉ-CUSSE, 19 setembru 2023 (TATOLI) – Kongregasaun komunidade Servarum do Espírito Santo (SSPS), reprezenta hosi Madre Imaculada de Almeida no reprezenta Kongregasaun Societas Vervi Difini (SVD), hosi Padre Stanis Kopon SVD, tersa ne’e hala’o enkontru ofisiál ho Autoridade Rejiaun Administrativa Espesiál Oé-Cusse Ambeno (RAEOA) hodi husu apoia atu harii sentru formasaun ba misaun Igreja Kátolika iha Sikone, suku Lalisuk, sub-rejiaun Pante Makasar.
“Ohin ne’e, autoridade hetan vizita ida hosi Kongregasaun SSPS ho SVD, iha audénsia ohin ne’e, asuntu atu atribuisaun rai ho medida ektare haat, ne’ebé sei aloka ba SVD ektare rua no SSPS ektare rua,” Sekretáriu Rejionál ba Asuntu Terra Propriedade, António Hermengildo da Costa, ba jornalista sira hafoin enkontru iha Gabinete ZEESM Oé-Cusse, tersa ne’e.
Autoridade ne’e informa, rai ne’ebé maka sei utiliza, ba futuru kongregasaun SVD ho SSPS atu uza rai ektare haat ne’e, sai hanesan sentru formasaun ida iha Oé-Cusse.
“Tán ne’e iha enkontru ohin, Prezidente Autoridade autoriza atubele identifika fatin no sukat, hodi oferese ba kongregasaun rua ne’e, ne’ebé fatin ne’e iha suku Lalisuk, bairru Sikone,” nia informa.
Madre Imaculada de Almeida, reprezenta Kogregasaun SSPS, informa, sentru formasaun ne’ebé sei harii iha futuru ho objetivu atu habelár misaun Igreja Katólika ba foin sa’e sira iha Oé-Cusse Ambeno.
“Ohin ami mai husu apoia ba Autoridade RAEOA atu halo sentru formasaun iha Oé-Cusse, ida-ne’e maka kontente, tanba Autoridade mós apoia ba kongregasaun rua ne’e, SSPS ho SVD atu kontinua habelar misaun Katólika ba foinsa’e sira iha Oé-Cusse,” nia orgullu.
Jornalista: Abílio Elo Nini
Editór: Evaristo Soares Martins
