DILI, 19 setembru 2023 (TATOLI)—Parlamentu Nasionál (PN), tersa ne’e, liuhosi reuniaun plenária aprova votu pezár no solidariedade ba vítima dezástre naturál iha Marroco no Líbia, ho rezultadu votasaun a-favór 55, kontra no abstensaun 0.
“Nune’e votu pezár aprovadu,” Prezidente Parlamentu Nasionál, Maria Fernanda Lay, hateten iha sala plenária.
Tuir testu projetuvotu númeru 21/VI/1a) pezár no solidarizasaun ba vítima afeta hosi rai nakdoko iha Marroco, ne’ebé sekretária Meza PN, Deputada Virgínia Ana Belo, lee sai katak iha loron 08 fulan-setembru tinan ne’e, ho magnitude boot akontese iha Marroco, ho efeitu devastadór, rejista ema 3000-resin lakon vida no ema 5000-resin kanek, alaiende ema 3000-resin dezalojadu afetadu hosi dezástre refere, rezulta mós estragu edifísiu no infraestrutura lubun.
Alseinde ba projetu votu númeru 22/VI(1a) pezár no solidarizasaun ba vítima tempestade no enchentes iha Líbia, katak iha loron 10 no 11 setembru tinan ne’e, violenta tempestade, udan torrenciais no inundasaun grave atinje iha territóriu Líbia, ho efeitu terrivelmente devastador, hafoin rompimentu barajen rua iha sidade Derna, provoka inundasaun iha sidade, destroi bairru inteiru, uma no infraestrutura no transporta ba tasi.
Númeru trájiku kuaze ema rihun 20-resin mak lakon vida, no rejista populasaun barak kanek no dezalojadu.
Iha momentu lutu no tristeza ne’ebé mak mosu, Parlamentu Nasionál hato’o nia tristeza ba katastrofe no nia solidariedade ba vítima no povu Marokinu no Lídia ho kondolénsia ba família hotu ne’ebé lakon vida.
Projetu votu pezár ne’e aprezenta hosi Deputadu proponente Duarte Nunes (CNRT) ho António da Conceição ‘Kalohan’ (PD).
Deputadu Duarte Nunes hateten, nu’udar proponente aprezenta projetu votu pezár ne’e hato’o sentimentu triste nune’e fó solidariedade.
Jornalista : Nelson de Sousa
Editór : Cancio Ximenes
