OÉ-CUSSE 19 setembru 2023 (TATOLI – Diretór Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), Luiza da Costa, hato’o ona karta pedidu husu apoia viatura hamutuk 30 hodi transporta materiál iha eleisaun suku.
“Kona-bá transporte daudaun ne’e ita submete ona karta pedidu iha Autoridade RAEOA, ita husu atu apoia viatura 30, inklui apoia ba eletrisidade, bee-moos iha sentru votasaun, nune’e iha eleisaun suku bele la’o ho susesu hanesan eleisaun parlamentár liubá,” Luiza da Costa ba Agência Tatoli iha Oé-Cusse, tersa ne’e.
Nia informa, STAE rekruta ona Pesoál STAE Apoia Suku (PSAS) na’in-18 atu destaka iha suku 18, no Pesoál STAE Apoia Aldeia (PSAA) sna’in-63 atu destaka iha aldeia 63, ezame eskrita no oras finaliza ona.
“Agora sira hosi (PSAA) ne’e hein de’it atu selebra kontratu iha outubru ne’e, ba PSAA sira-nia durasaun kontratu semana ida de’it ba loron eleisaun de’it no kontajEn,” nia katak.
Entretantu, kona-bá eleitór eleijível atu partisipa iha eleisaun suku, daudaun ne’e parte STAE Oé-Cusse, dezloka ona tékniku sira iha nasionál hodi halo sinkronizasaun, maka foin hatene dadus fiksa kona-bá eleitór sira.
Maibé bezea dadús eleitór ne’ebé partisipa iha eleisaun parlamentár iha loron 21 fulan-maiu tinan 2023 hamutuk 54.291, mane 27.681 no feto 26.610.
Notísia relevante:STAE Oé-Cusse hahú taka lista iha suku ba eleitór sira konfirma naran
Jornalista: Abílio Elo Nini
Editór: Evaristo Soares Martins
