DILI, 19 setembru 2023 (TATOLI)— Tribunál Judisiál Primeira Instánsia Díli, tersa ne’e, aplika medida koasaun proibisaun auzénsia ne’ebé previstu iha artigu 192 hosi kódigu prosesu penál, ba arguidu DJ ne’ebe tiru joven ho naran Julivio Pereira Bruno Pinto, ho pistola iha área Bidau-Akadiru-Hun, Suku Bidau Lecidere, Postu Cristo Rei, Munisípiu Dili.
Durante interogatóriu dahuluk Prokuradór Luis Hernani, promove arguidu DJ ho krime tentativa omesidu ne’ebé previstu iha artigu 138 hosi Kódigu Penál.
Arguidu DJ konfensa ba Tribunál katak nia mak halo duni asaun hodi tiru joven ne’e, tanba kestaun inseguransa no hafoin arguidu tiru tiha vítima nia rasik telefóne ba ambulánsia hodi lori vitima ba ospitál,nune’e arguidu rasik mak ba presta rasik deklasaun iha eskuadra polísia.
Defeza Estaqui Guterres afirma iha prosesu alegasaun Ministériu Públiku husu Tribunál atu aplika media koasaun aprezentasaun períodika ba arguidu DJ, maibé Tribunál deside medida koasaun proibisaun auzénsia ba membru polísia atu kontinua servisu loron-loron.
“Ha’u aseita ho despaixu tribunál nia ne’e, tanba medida koasaun ne’e adekuandu duni tanba arguidu rekoñese faktus sira hotu katak nia mak halo duni,” dehan Defeza Estaqui Guterres ba jornalista sira.
Tribunál haree katak arguidu laiha ameasa la halai hosi aktu ne’ebé nia halo no previstu iha artigu 183 hosi Kódigu Penál TL. Tanba ne’e la presiza aplika medida kosaun aprezentasaun periódika, maibé aplika medida koasaun proibisaun auzénsia no ida ne’e mak nesesáriu duni hodi arguidu bele movimentu iha territóriu nasionál.
“Kuandu arguidu atu sai hosi territóriu nasionál tenke informa ba Ministériu Públiku tanba medida koasaun ida ne’e aplika ba arguidu durante kazu ne’e sei iha prosesu investigasaun hela,” hatan nian.
Hatan kona-ba, krime tetativa omésidu ne’ebé mak MP promové ba arguidu, nia hateten, prosesu ne’e sei iha hela faze haklean investigasaun hosi MP.
“Arguidu komete krime tentativa ómesidiu ka lae, kazu ne’e sei iha hela faze investigasaun ne’ebé Ministériu Públika mak iha kompeténsia atu hakle’an kazu ne’e. Ita agora ko’alia mak medida koasaun ne’ebé mak tribunál aplika ba arguidu,” nia hakotu.
Notísia relevante: PNTL detein ona suspeitu tiru joven ida iha Bidau
Jornalista : Natalino Costa
Editór : Florencio Miranda Ximenes
