MALIANA, 19 setembru 2023 (TATOLI) – Xefe suku Lour, postu administrativu Bobonaro, munisípiu Bobonaro, Miguel Lopes Gomes, kontinua husu no ezije ba Eletrisidade Timor-Leste, Empreza Públika (EDTL,E.P) atu aselera projetu eletrifikasaun hodi instala enérjia elétrika ba komunidade aldeia rua iha suku refere.
Xefe suku Miguél konfirma, iha loron 31 fulan-jullu 2022 hetan ona despaxu aprovasaun hosi EDTL,E.P nasionál ba proposta ne’ebé nia rasik aprezenta, maibé to’o agora seidauk iha prosesu implementasaun.
“Ami espera bele responde iha tempu badak, tanba foin lalais hosi ekipa nasionál EDTL mai to’o ona ami-nia fatin hodi halo levantamentu ba problema ida-ne’e,” nia informa ba jornalista sira, iha Lour, segunda ne’e.
Enkuantu komunidade Lour ne’ebé seidauk asesu eletrisidade mak hanesan aldeia Helikei sorin balu, aldeia Olo-Olo no Galithas ho totál uma-kain 100-resin.
Notísia Relevante:Aldeia tolu iha suku Lour seidauk asesu eletrisidade-bee moos
Jornálista : Sérgio da Cruz
Editór : Evaristo Soares Martins
