APC Covalima rejista vítima dezastre naturál 957 iha 2023
COVALIMA, 20 setembru 2023 (TATOLI)–Autoridade Protesaun Sivil (APC, sigla portugés) Covalima rejista vítima dezastre naturál ne’ebé akontese iha munisípiu Covalima hamutuk xefe família 957 iha fulan-jullu tinan 2023.
“Tuir dadus 2023 vítima dezastre naturál xefe-família 957 ne’ebé ami fó ona apoiu emejénsia no materiál konstrusaun ba vítima dezastre naturál iha munisípiu Covalima,” Komandante Autoridade Protesaun Sivíl (APC) Covalima, Inpestór Xefe Flavio Mendes hateten ba jornalista sira iha Covalima, kuarta ne’e.
Hafoin akontese dezastre naturál ekipa sira halo lavantamentu dadus hodi haree kondisaun vítima dezastre naturál ne’ebé katégoria aat totál, aat kmaan no aat naton hodi fó apoiu emerjénsia.
Vítima dezastre naturál xefe família 957 ne’e maioria vítima dezastre naturál ho tipu inundasaun ne’ebé akontese iha postu administrativu hitu, no hosi dadus xefe família 957 ne’e xefe família uma kain 168 tama iha lista atu fó apoiu materiál rekuperasaun tanba tama iha kategoria tipu dezastre aat totál, aat naton no aat kmaan ne’e Governu distribui ona materiál konstrusaun hanesan iha suku Zulo ba xefe família 57.
Iha segunda (18/09), Governu liuhosi Sekretáriu Estadu Protesaun Sivíl distribui ona materiál konstrusaun no subsídiu Mão de Obra ba vítima dezastre naturál hamutuk xefe família 38, mai husi postu administrarivu sira hanesan Fatululik, Fatumea, Maucatar, Tilomar no Suai.
Vítima dezastre naturál ne’ebé simu materiál konstrusaun ne’e ho katégoria hanesan aat kmaan iha xefe família 21, aat naton hitu (7) no aat totál iha 10.
Iha kuarta (19/09), Governu entrega subsidíu ba vítima dezasre naturál ho tipu rai-halai iha suku Zulo, postu administrativu Zumalai, munisípiu Covalima no distribui materiál konstrusaun no subsídiu ba vítima iha postu administrativu Fohorem.
Jornalista : Celestina Teles
Editór : Cancio Ximenes
