Autoridade Covalima halo abertura jogu basketból nivél ensinu sekundáriu
COVALIMA, 20 setembru 2023 (TATOLI)–Autoridade Covalima hamutuk ho Sekretáriu Jerál Federasaun Nasionál Basketból Timor-Leste hala’o abertura kompetisaun jogu basketból nivél ensinu sekundáriu iha kampu eskola sekundária jerál públiku Suai.
Reprezentante administradór munisípiu Covalima, Germana Guterres Amarál, hateten iha Covalima hanesan faze dahuluk hala’o kompetisaun torneiu basketból nivél ensinu sekundáriu.
“Federasaun Nasionál Basketból Timor-Leste hala’o atividade kompetisaun jogu Basketból hanesan faze dahuluk hala’o iha munisípiu Covalima, basketból importante iha parte desportu,” Reprezentante autoridade hato’o liuhosi nia diskursu molok hala’o abertura kompetisaun torneiu basketból , iha kampu eskola sekundáriu jerál Suai, kuarta ne’e.
Realidade iha munisípiu Covalima sei menus hala’o atividade desportu basketból, nune’e hanesan reprezentante autoridade Covalima hato’o agradesimentu ba FNBTL hamutuk ho UN Women hodi hala’o atividade desportu basketból.
Reprezentante UN Women Timor-Leste, Ubalda Alves, hateten nia parte kontente bainhira hamutuk estudante sira hodi realiza eventu torneiru basketból ne’ebé importante UN Women hamutuk ho FNBTL.
Molok atu realiza atividade baskeból, estudantente sira tuir uluk formasaun durante loron rua hodi hasa’e estudante sira-nia koñsementu kona-ba igualdade jéneru, direitu umanu, oinsá atu hala’o prevensaun violénsia bazeia ba jéneru no asedíu seksuál.
Atividade torneiu basketból hala’o iha munisípiu sira hanesan Díli, Baucau, Covalima no Rejiaun Administrativu Espesiál Oé-Cusse Ambeno (RAEOA).
Sekretáriu Jerál Federasaun Nasionál basketból Timor-Leste, Isildo Tilman, hateten Federasaun Nasionál Basketból Timor-Leste hala’o atividade kompetisaun jogu Basketból servisu hamutuk ho UN Women ne’ebé hetan apoiu finanseira hosi Koica.
“Federasaun Nasionál Basketból Timor-Leste ohin hala’o abertura kompetisaun torneiu basketból tree ex tree ha’u hein eventu ida-ne’e sei espíritu foun ba atleta-sira, nune’e Covalima mós iha nia reprezentante iha nivél nasionál,” nia hateten.
Federasaun Nasionál Basketból Timor-Leste sei hato’o ba Governu, nune’e kontinua hala’o atividade desportu basketból iha munisípiu sira.
Iha jogu basketból ne’e partisipa hosi eskola Kafe ho nia klubu A to’o C, eskola Sekundáriu Ave Maria Suai ho nia klubu A to’o C, eskola Sekundáriu jerál Públiku Suai ho nia klubu A to’o C no Eskola Téknika Vokasionál (TEKVOK) ho nia klubu A to’o C.
Atividade kompetisaun jogu basketból nivél ensinu sekundáriu ba sira-ne’ebé sai vensedór sei hetan prémiu, maibé sekretáriu jerálla lembra montante osan ne’ebé atu distribui ba manán-nain iha kompetisaun torneiu basketból.
Tuir planu premíu ne’ebé atu distribui ba manán nain kompetisaun basketból, iha loron 16 ativismu bainhira hala’o kampañia iha nivél nasionál.
Jornalista : Celestina Teles
Editór : Cancio Ximenes
