DILI, 20 setembru 2023 (TATOLI) – Eskola Bázika Sentrál (EBC, sigla portugés) Sagrado Coração de Jesus (SACROJE) Aitutu Rina iha Ainaro laiha kondisaun atu halo prosesu aprendizajen.
Eskola ne’ebé didin de’it ho bebak ne’e naksobu ona no halo estudante sira labele estuda ho di’ak.
Januário Cardoso, profesór EBC SACROJE Aitutu Rina, relembra katak eskola katólika ne’e harii husi komunidade sira iha 2008.
“Iha eskola ne’e mesak Timór nia oan de’it ne’ebé maka hakarak hetan matenek atu dezenvolve nia rain. Eskola ne’e eziste kuaze tinan 15 ona. To’o ohin loron seidauk hetan atensaun ida husi Governu”, profesór ne’e relembra.
Estabelesimentu eskolár ne’e hetan vizita husi Ministra Edukasaun iha 2017 no promete katak sei tau prioridade ba eskola ne’e, maibé to’o ohin loron nia kondisaun mak nune’e nafatin.
“Eskola primeiru no segundu siklu Aitutu Rina agora ne’e aat liután. Labarik sira estuda iha aula laran ne’e dalabarak la sente seguru. Kuandu anin maka’as, eskola tenke foti desizaun hodi hapara prosesu aprendizajen ba labarik”.
Meza no kadeira mós barak maka aat ona no kuandu udan monu rai tahu maka nakonu. Kuadru ba hakerek la sufisiente no halo eskola ida ne’e enfrenta difikuldade boot.
“Ha’u lori EBC ne’e nia naran husu ba Ministra Dulce ne’ebé hetan fali fiar hodi asume responsabilidade atu labele haluha promesa ne’ebé hato’o ona iha tinan neen liubá. Nune’e, eskola ne’ebé lokaliza iha Suku Mulo bele hetan tratamentu di’ak hanesan eskola sira seluk iha territóriu”, dosente ne’e espera.
Eskola ne’e iha alunu hamutuk 268 – mane 141 no feto 127. Iha profesór 16 kompostu husi permanente neen, kontratadu tolu no voluntáriu hitu.
Jornalista: Tomé Amado
Editora: Maria Auxiliadora
