DILI, 20 setembru 2023 (TATOLI) – FALINTIL Forsa Defeza Timor-Leste (F-FDTL), hamutuk forsa hosi nasaun Estadus Unidus Amerika (EUA), Austrália, Nova-Zelandia no Japaun demonstra atividade ho naran ezersísiu militár kombate enjinaria.
Ezersísiu kombate enjinaria ne’e hala’o iha área karega tiru Komponente Apoia Servisu (KAS) Metinaru, iha kuarta (20/9), ohin.
Atividade refere, kompostu hosi F-FDTL ho membru hamutuk 110, Austrália na’in-69, Nova-Zelándia nain-haat, Japaun 16 no militár Estadus Unidus Amerika 19.
Iha ezersísiu ida ne’e, forsa nasaun lima hatudu exibisaun relativa ho preparativu sira kona-ba infraestrutura bázika hanesan loke Estrada enderesa ba komunidade sira, fasilidade mobilidade ba apoiu infraestrutura, salvamentu ba ema nia vida, identifikadu fatin risku ba materia esplozaun sira.
“Ezersísiu ida ne’ebé ami ohin hosi forsa nasaun lima hatudu mak hanaran ezersísiu kombate enjinaria, liuliu hadia dalan ba komunidade sira atu bele liu”, hateten hosi komunikadu ne’ebé Tatoli asesu, ohin.
Iha nota imprensa ne’e sita mós militár sira halo mobile traning team, liuliu iha área kulinaria, treinamentu soldadura, mandór oinsá atu sai mandór no water plafication liuliu fura bee moos ba komunidade sira.
Ezesísiu Harii Hamutuk 2023 militár sira konsege halo kazerna rua iha Komponente Apoia Servisu Metinaru, halo reabilitasaun rua iha Odelgomo Bobonaro no fahe mós solár panel hamutuk 20 ba komunidade sira iha área refere no rua ba eskola ne’ebé reabilitadu.
Ezersísiu Harii Hamutuk 2023, hala’o durante fulan ida, hahú iha 27 agostu no sei remata iha loron 27 setembru.
Jornalista: Natalino Costa
Editór : Zezito Silva
