DILI, 20 setembru 2023 (TATOLI)– Xefe Suku Kairui, Postu Administrativu Laleia, Munisípiu Manatuto, Roberto Ximenes, klarifika katak, idoza Joana da Costa ho idade 78 ne’ebé hakotu is tanba hamlaha, iha tersa (19/09/2023) ne’e laloos.
“Ha’u klarifika katak, informasaun ne’ebé partilla hosi ema balun iha mídia sosiál katak idoza ida iha Kairui hakotu is tanba hamlaha ne’e laloos tanba ne’e ha’u husu Polísia atu kaer ema ne’ebé lansa informasaun tanba halo foer Suku Kairui, Postu Laleia no Munisípiu Manatuto nia naran”, Xefe Suku Kairui Roberto Ximenes informa ba Agência Tatoli via telefónika, kuarta ne’e.
Autoridade lokál ne’e hatutan, idoza Joana da Costa durante ne’e moras bebeik, ida-ne’e kestaun idade.
“Joana durante ne’e simu osan idozu, hanusa maka nia hamlaha fali, karik mate tanba hamlaha ha’u hakarak husu ba ema ida lansa informasaun ne’e hatudu evidénsia katak idoza ne’e mate tanba hamlaha”, nia kestiona.
Sorin seluk, familía matebian, Mariano da Costa konta katak, idoza Joana da Costa durante ne’e moras bebeik, tanba ne’e maka halo oin halai no oin nakukun hodi nune’e to’o hakotu is.
“Matebian hakotu is la’ós tanba hamlaha”, Mariano tenik.
Entretantu, matebian moris iha Suku Kairui iha loron 10 janeiru 1945, dadaun kompleta ona idade 78, matebian iha oan feto ida maibé mate ona iha 1975, enkuantu kaben hosi idoza mate iha 1989.
Jornalista : Antónia Gusmão
Editór: Rafael Ximenes de A. Belo
