Komunidade Covalima preokupa ho folin foos sa’e iha merkadu
COVALIMA, 20 setembru 2023 (TATOLI)–Komunidade Covalima preokupa ho folin foos sa’e iha merkadu, postu administrative Suai, munisípiu Covalima.
Notísia Relevante: Governu sentrál sei apoia foos tonelada 3.000 ba RAEOA
Reprezentante Komunidade Covalima, Mateus Nico Mendonça, hateten, folin foos ne’ebé antes ne’e kilograma 25 ho folin $15.00 ne’e, agora daudaun sa’e ba $18,50 kada saka ida, foos ho kilograma 20 ne’ebé antes ne’e ho folin $ 12.00 agora sa’e ona ba $15.00.
“Ami sente triste tebes ho folin foos iha merkadu ne’ebé sa’e makaas tebes ne’e,” Mateus Nico Mendonça hateten ba Agência tatoli, iha Kampung Baru, kuarta ne’e.
Ho folin foos ne’ebé sa’e, iha merkadu debos hanesan komunidade rekomenda ba Governu atu halo intervensaun ba folin foos nune’e povu bele iha kbiit atu sosa.
Governu la halo intervensaun ba folin foos ne’ebé sa’e iha merkadu, entaun oinsá povu sira atu han saida no povu sira laiha kbiit atu sosa foos ho folin ne’ebé makaas.
Komuniaade Tarcisio do Carmo Fereira Soares hateten, folin foos ne’ebé sa’e iha merkadu fó impaktu boot ba povu sira atu sosa foos, tanba rendimentu povu sira laiha kbiit atu sosa ho folin foos ne’ebé sa’e.
“Ha’u hanesan komunidade preokupa ho folin foos sa’e iha merkadu, tanba ami laiha ona kbiit atu sosa folin foos ne’ebé agora sa’e makaas nune’e presiza halo intervensaun,” nia dehan.
Ho folin foos ne’ebé sa’e tanba Timor-Leste dependénsia foos importasaun ho folin foos sa’e hanesan sai matéria oinsá bele hasa’e produsaun iha rai-laran nune’e Timor-Leste labele dependénsia demais ba importasaun foos hosi estranjeiru.
Komunidade Barnabe Fereira reforsa, komunidade rekomenda ba Governu atu halo intrevensaun folin foos iha merkadu ho urjente tanba folin foos iha merkadu Debos sa’e makaas halo komunidade laiha kbiit atu sosa.
“Ha’u husu Governu tenke halo intervensaun ho urjente ho folin foos ne’ebé sa’e iha merkadu, tanba foos nesesidade ne’ebé importante ba komunidade sira atu konsumu loro-loron,” nia dehan.
Timor-Leste dependénsia ba foos importasaun ho foin ne’ebé sa’e fó oportunidade ba agrikultór sira atu hasa’e produsaun iha rai-laran, nune’e labele dependénsia ba foos importasaun.
Nian ab kioske, Martinha de Áraujo, hateten nia parte hasa’e folin foos la’ós tuir sira-nia hakarak maibé depende folin foos iha Dili sa’e entaun folin iha merkadu Suai tenke sa’e.
“Ami hasa’e folin foos la’ós tuir ami-nia hakarak maibé ami faan depende ami sosa folin foos iha Dili, nune’e ami mai faan iha munisípiu hodi hetan funan uitoan tan,” nia hateten.
Funsionáriu Ministériu Turizmu Comersiu no Indústria (MTCI) Covalima, Vitrico Brito da Silva, hateten MTCI Covalima halo ona levantamentu dadus iha jullu tinan 2023, ne’ebé ho nia rezultadu hatudu katak folin foos iha merkadu la normal, nune’e hanesan funsionáriu relata ona rezultadu levantamentu dadus ba nasionál.
Hafoin halo lavantamentu dadus hodi relata ba nasionál, maibé tama iha fulan-agostu fulan-setembru ne’e, folin foos ho kilograma 25 antes ne’e ho folin $12, sa’e ona ba $18,50.
“Ita kompara folin folin foos fulan-rua liuba agora folin foos aumenta,” nia dehan.
Funsionáriu MTCIA halo levantamentu ona dadus hodi relata ona ba nasionál, nune’e hein desizaun hosi nasionál.
Tuir observasaun Agência Tatoli iha terrenu hatudu katak folin nesesidade bázika hanesan foos ho kilograma 25 ne’ebé antes ne’e ho folin $12,00 ne’e sa’e ona ba $18,50, nune’e folin foos iha postu administrativu ho kilograma 25 sa’e ona ba folin $20 to’o $22.00.
Jornalista : Celestina Teles
Editór : Cancio Ximenes
