COVALIMA, 20 setembru 2023 (TATOLI)–Ministériu Kormérsiu Indústria (MKI) Covalima, menus rekursu umanu no transporte hodi difikulta funsionáriu atu hala’o servisu iha fronteira Mota-Masin no iha vila laran.
“Ami-nia preokupasau dahuluk ne’ebé durante ami enfrenta menus rekursu umanu molok ne’e, ami-nia funsionáriu na’in-neen (6) maibé agora hela na’in-tolu (3) ne’ebé servisu iha Ministériu Kormérsiu Indústria (MKI) Covalima,” Xefe Departamentu MKI Covalima, Dedianos Mau, hateten ba Agência Tatoli, iha nia servisu fatin Sukaer Laran, kuarta ne’e.
Menus rekursu MKI, nia dehan, sai preokupasaun tanba oras ne’e daudaun funsionáriu permanente na’in-tolu (3) de’it mak servisu iha Ministériu Kormérsiu Indústria (MKI) Covalima no fusionáriu kazuál na’in-tolu (3) labele kontinua ona servisu, tanba sira-nia kontratu ramata.
Tanba ne’e, funsionáriu ne’ebé oras ne’e daudaun servisu iha Ministériu Kormérsiu Indústria (MKI) Covalima hamutuk na’in-tolu, nune’e difikulta tebes bainhira atu hala’o servisu iha terrenu
Razaun tanba funsionáriu ne’ebé hala’o servisu iha fronteira Mota-Masin Salele ne’e tenke kontrola kamionete ne’ebé importadu nesesidade bázika hosi Indonezia mai Timor-Leste ne’e, agora labele hala’o ona sira-nia knaar tanba seidauk estende sira-nia kontratu.
Xefe departamentu ne’e rekomenda ba Governu sentrál atu halo rekrutamentu, nune’e funsionáriu sira bele hala’o servisu liuliu iha fronteira Mota-Masin Salele, nune’e bele kontrola importasaun nesesidade bázika iha Covalima.
“Ami agora laiha ona informasaun kamionete ne’ebé lori sasán hosi Indonezia mai iha Timor-Leste liuhosi fronteira Mota-Masin, tanba ita laiha ona funsionáriu destakadu iha fronteira hodi relata informasaun kada loron totál kamioneta lori sasán hosi Indonézia mai iha Timor-Leste,” nia hateten.
Tuir planu, presiza halo rekrutamentu funsionáriu na’in-neen (6) nune’e funsionáriu na’in-rua (2) destaka iha fronteira Mota-Masin no funsionáriu na’in-haat (4) servisu iha munisípiu.
Aleinde relata menus rekursu umanu, Xefe Departamentu mós relata laiha transporte ba funsionáriu sira atu hala’o servisu iha terrenu, nune’e daudaun ne’e fusionáriu sira uza de’it transporte privadu hodi hala’o servisu.
MKI Covalima iha transporte motorizada ida de’it bainhira problema funsionáriu MKI Covalima defisil atu ba iha postu administrativu no suku konvustivél mós hosi munisípiu mak foti kupon iha nasionál hafoin hala’o servisu.
Jornalista : Celestina Teles
Editór : Cancio Ximenes
