TL-membru ASEAN diskute asuntu ODS iha Nova Iorke
DILI, 21 setembru 2023 (TATOLI) – Prezidente Repúblika, hamutuk ho Primeiru-Ministru Tailandia no Ministru Negósiu Estranjeiru Indonézia partisipa iha sorumutuk ho topíku “Haforsa parseria entre parte interesada oioin atu aselera Objetivu Dezenvolvimentu Sustentavél (ODS) iha ASEAN” ne’ebé hala’o iha Nova Iorke.
Eventu ne’e organiza hamutuk ho Tailandia, nu’udar Koordenadór ASEAN ba Kooperasaun ODS ho komisaun ekonómika no Sosiál Nasaun Unidas ba Ázia no Pasífiku.
“Eventu ne’e, nia objetivu mak atu fahe aprosimasaun distintu ba ASEAN no esperiénsia úniku iha lokalizasaun implementasaun ODS sira no mós atu diskute dalan sira hodi hasa’e parseria parte interesada oioin ne’ebé sistemátiku no efetivu hodi aselera asaun sira hodi alkansa ODS sira iha rejiaun ne’e”, hatete iha komunikadu ne’ebé Agência TATOLI asesu hosi Media Gabinete Prezidénsia Repúblika (GPR), ohin.
Diskusaun ne’e sei kobre tópiku sira ne’ebé relevante ba Simeira ODS atu rezolve dezafiu sira ne’ebé aselera implementasaun ODS sira.
“ASEAN iha espetativa ba Timor-Leste Bainhira sai membru ASEAN bele konsolida demokrasia iha Sudeste Aziátiku, komesa hosi konsolida demokrasia iha rai-laran to’o iha situasaun Myanmar ne’ebé preokupa tebes hosi Xefe Estadu”, tenik tan.
Iha eventu ne’e, Prezidente Repúblika fahe Timor-Leste nia esforsu iha polítika implementasaun ODS, hanesan iha progresu balu ne’ebé halo ona no balu ne’ebé seidauk iha progresu, tanba situasaun mundiál ne’ebé fó impaktu hanesan funu iha Ukraina.
Eventu ne’e, partisipa hosi reprezentante sira hosi Governu, empreza sira, organizasaun sosiedade sivíl, akadémiku no Nasaun Unidas.
Diskusaun sira-ne’e hatudu importánsia hosi parseria multi-interesada sira hodi alkansa ODS sira.
Iha enkontru ne’e, partisipante sira fahe prátika di’ak no lisaun sira ne’ebé aprende iha lokalizasaun implementasaun ODS no kultivasaun envolvimentu parte interesada oioin ne’ebé efetivu ba dezenvolvimentu sustentavel.
Iha okaziaun ne’e, diskute oinsá atu hametin parseria iha organizasaun rejionál nia laran no enkuadramentu institusionál sira hodi asegura asaun no impaktu polítika ne’ebé koesivu, kooperativa no koerente liu husi ODS.
Eventu ne’e remata ho apelu asaun ba parte interesada hothotu atu servisu hamutuk hodi aselera implementasaun ODS iha ASEAN.
Jornalista: Hortencio Sanchez
Editór : Zezito Silva
