DILI, 21setembru 2023 (TATOLI) – Diretór Servisu Saúde Ainaro Agostinho da Costa, dehan iha fulan agostu nia-laran moras ne’ebé rejista aas iha Servisu Saúde Munisipiu Ainaro mak moras Infesaun Vias Respiratóriu Aguda hamutuk 1.598.
”Iha fulan agostu moras ne’ebé rejistu aas iha Munisípiu Ainaro mak moras Infesaun Vias Respiratóriu Aguda hamutuk 1.598, tuir mak moras kulit hamutuk 90, moras pneumonia hamutuk 60 no Skabies 23”, Agostinho da Costa dehan ba TATOLI via telephone, ohin.
Nia informa, moras ISPA ne’e afeta ba labarik no mós ema boot sira.
”Moras ne’e mosu tanba daudaun ne’e tempu bailoron, rai rahun barak entaun ida ne’e mak fó impaktu ba labarik no mós ema boot sira hamosu fani, mear, inus been, isin manas oituan ida ne’e mak ita kategoria ba ISPA”, nia esplika.
Nia afirma, kona-ba moras sira ne’e médiku sira fó tramentu tuir diagnosa ne’ebé mak iha.
Atu halo prevensaun ba moras sira ne’e mak ba fatin ruma tenke uza maskara atu evita rai rahun sira han hahan ne’ebé ijiéne atu labele implika ba saúde”, nia husu.
Profisionál saúde sira ne’ebé halao kna’ar hodi fó atendimentu iha Munisípiu Ainaro hamutuk 140-resin.
Jornalista : Felicidade Ximenes
Editór : Zezito Silva
