Autoridade administrasaun sensibiliza lei suku iha Baucau
BAUCAU, 21 setembru 2023 (TATOLI) – Autoridade Administrasaun Munisipál sensibiliza lei suku ba líder komunitária postu administrativu Baucau Vila, munisípiu Baucau.
Xefi departamentu apoia suku, diresaun serbisu munisipál apoia organizaun naun-governamental no organizasaun komunitátria, Januário Correia, esplika, razaun sensibiliza lei-númeru 9/2019 kona-ba líder komunitária ba xefi suku, aldeia, juventude feto no mane inklui delegadu sira ligadu ho preparasaun elisaun suku iha fulan-outubru.
“Presiza atualiza no koordena nafatin ho lideransa komunitária sira hodi orienta di’ak liután nune’e bele hetan informasaun sufisiente bainhira hetan konfiansa hosi komunidade iha eleisaun suku,” nia hateten iha Vila Antiga, kinta ne’e.
Objetivu hosi sensibilizasaun ne’e atu hasa’e koñesimentu autoridade komunitária sira kona-ba lei númeru 9/20216 ne’ebé fó kompeténsia ba xefe suku, aldeia, lia-na’in, xefe joventude no delagadu sira inklui pesoál administrasaun suku iha postu Baucau Vila nune’e bele aumenta koñesimentu antes realizasaun eleisaun suku.
Autoridade munisipál finaliza ona atividade hanesan iha postu admistrativu liman seluk hanesan postu Laga, Baguia, Quelicai, Vemasse no Venilale no ikus remata iha Baucau Vila nu’udar parte preprasaun hasoru eleisaun suku.
Delegada suku Triloka, Maria Idalina da Costa Tilman, konsidera sensibilizasaun ne’e importante atu aumenta koñesimentu no enkoraja maluk feto sira atu hola parte iha kandidatura eleisaun suku.
“Hau prontu kandidata ba xefe suku tanba bele fó forsa mai ami feto sira,” Maria Tilman argumenta.
Nia husu ba feto maluk sira atu labele ta’uk no moe atu kandidata ba xefe suku no aldeia tanba laiha diskriminasaun entre feto no mane.
Munisípiu Baucau tuir planu sei realiza elisaun iha suku hamutuk 62 hafoin iha tinan-ne’e aumentu suku foun tolu hosi totál postu administrativu neen hanesan Baucau Vila, Baguia, Laga, Quelicai, Venilale no Vemasse.
Jornalista : Natalino Belo
Editór : Evaristo Soares Martins
