VIQUEQUE, 21 setembru 2023 (TATOLI)—Empreza Darda G.M Unipesoal Lda ne’ebé responsável ba projetu konstrusaun morru haleu edifísiu administrasaun munisípiu Viqueque, kinta ne’e, entrega obra ba administrasaun munisipál.
“Ohin empreza responsabilidade entrega obra ba munisípiu halo jestaun, hanesan reprezentante Governu Sentrál iha nível munisipál. Iha prosesu implementensaun projetu sira iha nível nasioionál no munisipál tenke iha garantia kapasidade empreza sira no tenke kumpre dever bazeia prazu kontratu, kualidade no kompromisu tékniku ba finalizasaun projetu sira,” Administradór munisípiu Viqueque, Januário Soares ‘Bolly’, hateten hafoin ramata atuvidade iha resintu edifísiu administrasaun munisipál, kinta ne’e.
Notísia relevante : PDIM avalia implementasaun projetu haat iha Viqueque
Durante ne’e ekipa hosi Planu Integradu Dezenvolvimentu Munisípiu (PIDM) Viqueque akompaña no kontrola konstrusaun.
“Tuir loloos projetu konstrusaun morru haleu iha munisípiu Viqueque ho durasaun fulan-tolu, maibé extende to’o agora maka foin finaliza. Tanba ne’e maka ha’u deside ita ho empreza maka entrega, ha’u koordena ho nasionál, maibé sira preokupa ba planu asaun 2024, tanba ne’e sira labele marka prezensa iha serimónia entrega obra ida-ne’e,” nia akresenta.
Biban ne’e, Autoridade munisipál husu ba parte seguransa sivíl atu halo kontrolu ba morru tanba ema deskoñesidu tuda rahun iluminasaun ida iha tempu kalan no balun hakerek SDSB iha edifísiu oin.
“Ha’u husu ba seguransa sira tenke tau-matan tanba empreza entrega ona. Entaun ita maka tenke responsável tanba prazu retensaun hotu ona. Se maka estraga sein iha responsabilidade presiza haree tanba obra ne’e harii ho osan ruin no ran, nune’e labele estraga sasán sira-ne’e. Ha’u agradese ba empreza tanba bele finaliza ona projetu ida-ne’e,” nia akresenta.
Projetu ne’e hahú iha tinan 2021 no finaliza konstrusaun no retensaun iha setembru 2023. Projetu morru ho kategoria B tama ba orsamentu adiantamentu 51% ba konstrusaun iha munisípiu Viqueque, ho alokasaun ba kustu projetu $36.667,22.
Serimónia entrega obra hetan partisipasaun hosi autoridade lokál inklui diretór liña ministeriál sira.
Jornalista : Vitorino Lopes da Costa
Editora : Julia Chatarina
