Governu husu labele sunu rai no kuidadu flora-fauna iha Covalima

COVALIMA, 21 setembru 2023 (TATOLI)–Governu liuhosi Sekretáriu Estadu Floresta, Fernandinho Vieira, husu ba sidadaun sira atu iha tempu bailoro ne’e labele sunu rai no mós tenke kuidadu flora no fauna iha munisípiu Covalima.

“Aproveita oportunidade ida-ne’e hato’o ha’u -nia mensajen ba sidadaun hotu iha rai-laran, iklima bailoro naruk entaun sidadaun hotu fó importánsia labele sunu rai, labele kasa animál fuik no labele estraga ita-nia florano fauna iha rai-laran,” Sekretáriu Estadu Floresta, Fernandinho Vieira, hateten mensajen ne’e iha salaun Administrasaun Covalima, Sukaer Laran, kinta ne’e.

Flora no fauna, nia dehan, ida-ne’e sai rikusoin nasaun nian no rikusoin ne’ebé hetan protesaun hosi lei tenke kuidadu, iha área ne’ebé sai hanesan área rezerva iha postu administrativu Tilomar, Foho Taroman ne’bé lokaliza iha postu administrativu Fatululik, munisípiu Covalima.

“Flora no fauna ita-nia rikusoin ne’ebé ita-nia lei proteje, ita tenke kuidadu ita-nia flora no fauna ne’ebé lei bandu, Iha ne’e, liuliu kuidadu iha área sira-ne’ebé ita deklara sai hanesan área rezerva iha Tilomar no iha foho Taroman, halo ona demarkasaun kuida nafatin viodiversidade sai riku nasaun nian, atu bele fó sustentabilidade dezenvolvimentu iha munisípiu rasik,” nia dehan.

Antes ne’e, Xefe Departamentu Reprezentasaun Territoriál Floresta Planta Indústria Covalima, Francisco Sarmento, husu ba sidadaun sira kuidadu flora ho fauna, se la kuidadu maks ei fó impaktu ba umanu.

Guarda floresta kontrola flora n fauna liuhosi halo patrullamentu no hala’o sensibilizasaun ba komunidade, nune’e kominidade bele kompreende oinsá bele kuidadu flora no fauna.

Funsionáriu guarta floresta planta Indústria no tékniku durante halo patrullamentu iha munisípiu Covalima hamutuk na’in-39.

Jornalista : Celestina Teles

Editór         : Cancio Ximenes