Kondisaun tratór aat difikulta agrikultór iha Baucau
BAUCAU, 21 setembru 2023 (TATOLI) – Tratór iha serbisu munisipál agrikultór hetan estragu nune’e difikulta fila-rai agrikultór sira iha munisípiu Baucau.
Responsável Mekanizasaun Serbisu Munisipál Agrikultura Baucau, José Lopes, esplika, proposta hosi komunidade hosi postu admistrativu sira hamutuk 600 nune’e afeta ba kuantidade tratór hodi fila-rai liuliu prepara to’os hodi kuda ai-horis iha rai-maran.
“Proposta barak dalaruma ami labele atende hotu tanba tratór ualu de’it,” Responsávél mekanizasaun agrikultór Baucau hateten iha Vila Nova, kinta ne’e.
Ekipa tékniku mekanizasaun agrikultór Baucau halao manutensaun ba tratór hanesan troka ekipamentu sira maibé seidauk kompleta mesmu ekipamentu fornese ona hosi nasionál.
Ekipamentu ne’ebé fornese hosi ministériu seidauk tuir espesifikasaun, maske antes ne’e parte dirijente munisípiu hato’o ona proposta tuir kondisaun tratór ne’ebé hetan estragu.
Proposta ne’ebé hato’o bazea ba ekipamentu ne’ebé aat hakerek no justifika kona-ba ekipamentu ne’ebé presiza troka maibé realidade prosesu liuhosi konkursu públiku nune’e kompañia responsável kompra latuir nesesidade.
Alende ne’e, orsamentu ba manutensaun tratór kada tinan sempre iha redusaun nune’e afeta ba prosesu manutensaun bainhira tratór hetan estragu iha situasaun emerjénsia.
Tratór ne’ebé hetan estragu kategoria aat, kamaan maibé tanba ekipamentu la sufisiente no orsamentu ne’ebé limitadu afeta ba tratór tenke paradu.
“Kada trimestrál ami sempre hatoo proposta, espera ministériu iha hanoin di’ak halo mudansa nune’e tratór sira-ne’e bele funsiona fali,” José Lopes argumenta.
Serbisu Munisipál Agrikultura Baucau atuál simu pedidu hosi komunidade agrikultór sira hosi postu administrativu hamutuk proposta 600 atu fila-rai hodi prepara to’os ba époka tinan-ne’e.
Totál tékniku mekanizasaun iha Agrikultór Baucau hamutuk na’in-tolu no tratór hamutuk 14 komposta hosi tolu paradu no ida presiza hadi’a no hela ualu funsiona.
Jornalista : Natalino Belo
Editór : Evaristo Soares Martins
