DILI, 21 setembru 2023 (TATOLI) – Diretór Jerál Servisu Koorporativu iha Ministéiru Saúde, Marcelo Amaral, hateten profisionál saúde ne’ebé servisu iha klínika privada sira sei prosesa tuir regulamentasaun ne’ebé iha.
“Profisionál saúde ne’ebé servisu iha klínika privada sira daudaun ne’e sei prosesa tuir regulamentasaun ne’ebé iha, tanba iha lei númeru 86/2022 la fó dalan ba servisu profisionál saúde sira ne’ebé halao servisu iha Governu no halo tan servisu iha klínika privada sira, tanba Governu da-ualu la konsege halo ida ne’e, entaun espera Governu da-sia bele prepara atu regula”, Marcelo Amaral ba TATOLI iha nia kna’ar fatin Caicoli, ohin.
Nia informa, lei ida-ne’e bele implementa direta maibé dalaruma hamosu implikasaun administativa balun ho nune’e mak presiza regulamentasaun para regula didiak.
“Ita implementa lei direta ne’e di’ak maibé dalaruma hamosu implikasaun administrativa balun tanba ne’e mak presiza regulamentasaun para regula didiak atu ita-nia lei ne’e bele implementa ho di’ak”, nia afirma.
Nia esplika, bainhira sira kontinua nafatin servisu iha klínika privada sira mak ida ne’e sei iha regulamentasaun mak sei ko’alia tanba kestaun ne’e publiku mós kestiona maibé ida ne’e presiza regula tanba ne’e ligasaun ho bens estar profisionál saúde sira-nian.
Kona-ba regulamentasaun ne’e kabe ba membru Governu sira maibé hanesan ofisiál informa nafatin ba membru Governu sira hodi fó atensaun ba regulamentu no instrumentu legál sira ne’ebé mak iha.
“Ha’u la iha númeru ezatu ba médiku espesialista sira ne’ebé mak servisu iha klínika privadu sira maibé mediku sira barak gradua mai husi Indonézia no Filipina mak prátika iha klínika privadu sira no sira ne’ebé mak gradua liuhosi sistema kuba nian”, nia subliña.
Jornalista : Felicidade Ximenes