DILI, 21 setembru 2023 (TATOLI)—Sekretáriu Estadu Asuntu Kombatente Libertasaun Nasionál (SEAKLN), César dos Santos da Silva, hateten iha atribhisaun format ba uma-lisan iha territóriu nasionál ne’e, Governu liuhosi MAKLN no SEAKLN rejista ona ema mate iha funu laran ne’e hamutuk 233.951.
“Ami rejista ona uma lisan embora iha suku no aldeia balun mak seidauk hotu maibé maioria uma lisan mak ita konklui ona ho totál hamutuk 233.951. Ida-ne’e mak dadus ema mate iha funu laran. Maibé ita sei verifika no halo validasaun ba númeru ne’e tanba ita seidauk hatene keta númeru ne’e mós ema milísia sira iha karik,” nia dehan ba jornalista sira, iha salaun CCLN, Arte Moris, Comoro, Dili, kinta ne’e.
Nia dehan, ida-ne’e polítika Governu nian hodi oinsá identifika ema mate iha funu laran, nune’e iha VIII Governu Konstitusionál atribui formatu ba uma lisan sira hotu iha Timor-Leste atu prienxe.
Atu responde ba atribuisaun formuláriu ba uma lisan ne’e mak Governu planeia hodi konstrui monumentu iha postu administrativu 65 iha territoriu nasionál.
Entaun, nia dehan, liuhosi formaláriu ne’e bele hetan númeru serteza no ema na’in hira mak mate iha luta libertasaun nasionál, tanba durante ne’e siik de’it katak ema mate 250.000 maibé seidauk iha serteza.
“Objetivu ami konstrui monumentu ne’e atu hakerek mártir sira-nia naran tanba saudozu balun ita la hetan ona entaun polítika ida-ne’e mak bele responde ema hotu nia hanoin no hakarak. Hosi monumentu 65 ne’e, ami identifika hotu ona nune’e hein 2024 mak realiza programa ne’e. Ida-ne’e mak sei simboliza ba saudozu ne’ebé ita la hetan ruin, nune’e ita valoriza no dignifika sira. Ida-ne’e ba frente tolu mak armada klandestina no diplomata,” nia hateten.
Jornalista : Osória Marques
Editór : Cancio Ximenes
