SEF-autoridade Covalima diskute minimiza atividade tranzaksaun ai-kameli ilegál
COVALIMA, 21 setembru 2023 (TATOLI)–Governu liuhosi Sekretáriu Estadu Floresta (SEF), Fernandinho Vieira, no Administradór Covalima, Francisco de Andrade, hasoru malu no diskute kona-ba atu minimiza atividade tranzaksaun ai-kameli ho ilegál iha fronteira Covalima.
“Ha’u mai vizita no hasoru administradór Covalima hodi halo liña koordenasaun ho autoridade lokál kona-ba oinsa atu minimiza tranzaksaun ilegál ai-kameli no ema tesi ai-kameli ilegál iha fronteira,” Sekretária Estadu Floresta, Fernandinho Vieira, hateten ba jornalista-sira, iha salaun Administrasaun Covalima, Sukaer Laran, kinta ne’e.
Aleinde halo diskusaun nia mós informa ba administradór, kona-ba munisípiu Covalima ne’ebé potensiál ba ai-teka ne’ebé bele kontribui reseita ba kofre Estadu.
“Ha’u informa ba administradór, Covalima hanesan rai ne’ebé poténsia ba área indústria ai-teka no floresta nian, hanesan iha tempu okupasaun Indonézia. Ha’u mai koordena oinsá ba oin ita rekolla reseita, nune’e bele fó benefisiu ekonómia ba ita nia-povu,” nia hateten.
Governante ne’e dehan, nia parte halo koodenasaun tuir planu banku europeia hakarak investe, setór floresta iha Covalima, ida-ne’e bele kria kampu traballu ba timoroan iha rai-laran.
Polítika Governu ai-teka moris iha Covalima pertense ba Estadu bele tesi, nune’e bele fó rendimentu ba Estadu atu sustenta mákina Estadu liuhosi produtu floresta no bele dezenvolve sándalo espésie, nia valór ekonómia aas iha merkadu nasionál no internasionál, nune’e bele dezenvolve iha Covalima.
Governante ne’e informa ba autoridade Covalima hodi fó nia apoiu bainhira tékniku servisu iha munisípiu koopera iha munisípiu to’o suku no aldeia.
Administradór Munisípiu Covalima, Francisco de Andrade, hateten sekretáriu nia prezensa iha Covalima hanesan vizita kortejia atu fó hatene relasaun servisu floresta no ko’alia kona-ba rikusoin iha autoridade Covalima.
“Sekretáriu Estadu ko’alia kona-ba ita-nia rikusoin ai-kameli no ait-eka ne’ebé hodi kontribui reseita ba kofre Estadu. Ita hatene vizita dahuluk servisu ba oin floresta ho autoridade la’o di’ak,” nia hateten.
Durante ne’e ai-kame libarak lakon, tanba ne’e autoridade mós hato’o rekomendasaun oinsá atu haree estrada iha fronteira, nune’e seguransa bele kontrola rikusoin Timor hanesan ai-kameli.
Jornalista : Celestina Teles
Editór : Cancios Ximenes
