VIQUEQUE, 22 setembru 2023 (TATOLI)—Sekretáriu munisípiu Viqueque, Teotónio Sarmento da Silva, enkoraja serbisu Toos ba Moris Di’ak (TOMAK) hodi kontinua implementa atividade agrikultura iha suku rurál atu reforsa agrikultór sira.
“Ita foka liu ba atividade tinan 2023. Antes ne’e, hahú ona faze dahuluk tinan 2016-2022 ho esperiénsia lubuk ida maibé ha’u prefere ba oin kontinua halo atividade agrikultura iha baze hodi eduka agrikultór sira hasa’e produsaun. Atu atinje mudansa ba progresu di’ak liután liuhosi aprosimasaun hamutuk, update progresu sira no enfrenta dezafiu hodi forma estratejia foun ba atividade TOMAK sira hodi ezekuta iha terenu,” Reprezentante Autoridade munisipál hateten hafoin ramata sorumutuk ho ekipa TOMAK, iha administrasaun munisípiu, sesta ne’e.
Notísia relevante : MAP-TOMAK kolleta hare variedade mean iha suku Macadique
Inisiativa halo sorumutuk hodi diskute no haree hamutuk progresu sira ne’ebé atinje iha fulan hirak ne’e nia laran, ho objetivu atu atualiza no fahe informasaun ba malu kona-ba TOMAK nia atividade dezenvolvimentu iha área rurál.
Programa TOMAK hanesan programa agrikultura ne’ebé finansia hosi Governu Austrália ba tinan-10, ne’ebé liu ona faze dahuluk 2016-2022 no tama ona faze daruak 2022-2026. Progresu faze daruak maka atualiza iha jullu 2023 to’o setembru 2023, hamutuk ho Komisaun Ligasaun Permanente nível munisípiu Viqueque.
“Ita hotu hatene Governu kada tinan aloka orsamentu sufisiente maibé la kobre nesesidade prioridade ne’ebé povu presiza, tamba ne’e ho prezensa ONG sira hnesan TOMAK no parseiru sira bele hatutan programa Governu liuhosi knaar ONG hodi responde preokupasaun komunidade ba dezenvolvimentu setór agrikultura inklui setór importante seluk hodi responde ba nesesidade báziku komunidade sira área rurál,” nia akresenta.
Nia dehan, dala barak ema hanoin kampu serbisu mak sai funsionáriu, maibé área importante barak mak bele uza no bele dezenvolve ba nesesidade moris.
“Moris la depende de’it sai funsionáriu, maibé sai agrikultór mós bele kontribui ba ita-nia moris. tamba ne’e, apresia tebes ho programa TOMAK hodi hatutan kbiit Governu iha alokasaun orsamentu ba setór agrikultura ne’ebé hanesan setór prioridade ba povu,” nia tenik.
Jornalista : Vitorino Lopes da Costa
Editora : Julia Chatarina
