iklan

POLÍTIKA

PN deside eleisaun komisáriu CAC sei hala’o iha 25 setembru

PN deside eleisaun komisáriu CAC sei hala’o iha 25 setembru

Prezidente Parlamentu Nasionál, Maria Fernanda Lay. Imajen/TATOLI

DILI, 22 setembru (TATOLI)—Prezidente Parlamentu Nasionál, Maria Fernanda Lay, informa enkontru lidér bankada parlamentár ohin deside ona ajenda eleisaun ba kandidatu komisáriu Komisaun Antí-Korrupsaun (CAC, siglá portugés) sei hala’o iha reuniaun plenária iha 25 setembru 2023.

Notísia Relevante: Bankada CNRT komunika ona FRETILIN ba eleisaun komisáriu CAC 

“Ohin, ami deside prioridade komisáriu CAC ami tenke hili no bankada sira hotu konkorda, tanba bankada sira hotu-hotu hanoin ida-ne’e kle’ur tiha ona,” Prezidente PN ne’e hateten ba jornalista sira hafoin ramata reuniaun líder bankada iha uma fukun PN, sesta ne’e.

Prezidente PN ne’e lakoi ko’alia kona-ba entendimentu bankada parlamentár sira kona-ba eleisaun komisáriu CAC, tanba asuntu ida-ne’e bankada sira mak hatene.

Antes ne’e, Xefe bankada CNRT, Deputadu Duarte Nunes, informa hasoru malu hodi hala’o ona komunikasaun ho bankada FRETILIN kona-ba eleisaun kandidatu komisáriu CAC.

“Ami hasoru malu iha loron hirak liu ba no halo ona komunikasaun, agora hein reuniaun líder bankada atu deside ajenda ba plenária hodi hala’o eleisaun,” Xefe bankada ne’e hateten ba Ajénsia TATOLI iha uma fukum PN, kinta ne’e.

Deputadu Duarte Nune, la fó sai kona-ba iha komunikasaun bankada konkordánsia atu hili kandidatu ida hosi kandidatu na’in rua ne’ebé Governu propoin.

“Ne’e la’ós ba públiku. Ami ko’alia tiha ona no iha ona konkordánsia, ne’e internál labele públika uluk buat ne’ebé ami ko’alia. Kontaktu halo tiha ona, ne’ebé hein eleisaun,” nia hateten.

Xefe bankada FRETILIN, Deputadu Aniceto Longuinhos Guterres Lopes, hateten agora tempu ona atu ita hapara kultura no esperiénsia sira buka blokeia de’it.

FRETILIN agora iha postura polítika foun, hakarak kolabora ba interese Estadu nian, tanba ne’e sempre tuir prinsípiu ne’e.

Governu liuhosi reuniaun Konsellu Ministru (KM), foin lala’is aprova proposta rezolusaun, ne’ebé aprezenta hosi Primeiru-Ministru kona-ba naran sira hanesan Sérgio de Jesus Fernandes da Costa Hornai no Rui Pereira dos Santos ne’ebé propoin ba PN ba kargu Komisáriu CAC hodi hetan aprovasaun.

Tuir lejizlasaun ne’ebé vigora, naran sira-ne’ebé propoin hosi Governu agora sei analiza no vota hosi PN, no sira-nia designasaun sei presiza maiória absoluta hosi Deputadu ne’ebé marka prezensa, pelumenus 3/4 hosi Deputadu ho funsaun efetiva.

Mandatu Komisáriu CAC, Sérgio Hornai, ramata ona iha janeiru 2023, nune’e iha mandatu VIII Governu Konstituisionál propoin José da Costa Ximenes (antigu Prokuradoria Jerál Repúblika) ba Komisáriu CAC maibé PN la konsege diskute to’o agora.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!