PR Horta hasoru IOM mantein kooperasaun
DILI, 22 setembru 2023 (TATOLI) – Prezidente Repúblika José Ramos-Horta hasoru malu ho Diretór-Jerál Organizasaun Internasionál ba Migrasaun (OIM), Amy Pope hodi ko’alia kona-ba oinsa atu fortifika liután kooperasaun iha área jestaun migratóriu no jestaun ba dezastre ka dezastre naturál sira ne’ebé rezulta hosi mudansa klimátika.
“IOM iha tinan ruanulu resin ikus ne’e hahú hosi diskusaun kona-ba restaurasaun Independénsia, nune’e mós posibilidade atu estabelese parseria kooperasaun foun iha área jestaun migratóriu no jestaun ba dezastre ka dezastre naturál sira ne’ebé rezulta husi mudansa klimátika”, tenik iha komunikadu ne’ebé Agência TATOLI asesu hosi Media Gabinete Prezidensia Repúblika (GPR), ohin.
Sorumutu ne’e hala’o iha okaziaun Prezidente Republika partisipa iha Sesaun dala-78 Asembleia Jerál Nasaun Unidas nian, ne’ebé hala’o iha Nova Iorke.
Sorumutu ne’e mós ko’alia kona-ba partisipasaun Prezidente Repúblika nian iha Konferénsia ho tema: “Ita haluha ona ami ka?” Asegura Solidariedade Global ho Rohingya Myanmar ne’ebé organiza husi Primeiru-Ministru Bangladesh, Sheikh Hasina, iha kolaborasaun ho Prokurador Tribunál Penál Internasionál (ICC), Karim Khan, iha ne’ebé konsidera solusaun oioin ba krize umanitária Rohingya Myanmar nian.
Kestaun krize polítika ne’ebé hamosu hosi okupasaun hosi junta militár Myanmar nian ne’ebé ukun hamutuk, mós ko’alia kona-ba posibilidade atu estabelese parseria sira iha ámbitu Programa Mobilidade Traballu nian ba sidadaun Myanmar sira iha área agrikultura, saúde, edukasaun no teknolojia informasaun nian no seluk tan.
Hafoin hasoru malu, Przidente Repúblika konvida kedan Diretóra-Jerál ne’e atu vizita Timor-Leste iha tempu besik nune’e bele asina tan akordu kooperasaun entre Timor-Leste ho IOM.
Jornalista: Hortencio Sanchez
Editór : Zezito Silva
