Xefe Estadu relata demokrasia TL iha ONU
DILI, 22 setembru 2023 (TATOLI) – Prezidente Repúblika José Ramos-Horta relata Timor-Leste nia demokrasia ba mundu bainhira partisipa iha Asembleia Jerál Organizasaun Nasaun Unidas (ONU) nian ba dala-78 ne’ebé hala’o iha Nova Iorke foin lalais ne’e.Iha diskursu Horta hatete, Timor-Leste nu’udar nasaun demokrasia, foin-sa’e ida-ne’ebé marka ho páz, toleránsia no liberdade.
“Timor-Leste hala’o ona eleisaun barak ho transparénsia no tranzisaun podér tuir tempu”, deklarasaun PR Horta iha Asembleia Jerál ne’e, liuhosi komunikadu ne’ebé Agência TATOLI asesu hosi Media Gabinete Prezidensia Repúblika, ohin.
Timor-Leste mós hetan rekoñesimentu internasionál ba ninia demokrasia no liberdade komunikasaun sosiál.
“Sosiedade multikulturál iha nasaun ne’e moris iha armonia, maibé rekoñese luta hasoru ki’ak ne’ebé la’o hela”, tenik iha komunikadu ne’e.
Jornalista: Hortencio Sanchez
Editór : Zezito Silva
