COVALIMA, 23 setembru 2023 (TATOLI)–Ministru Komérsiu Indústria (MKI), Filipus Nino Pereira, sábadu ne’e, hala’o diálogu hodi partilla polítika IX Governu Konstituisionál kona-ba dezenvolvimentu ekónomiku ba setór privadu iha Covalima.
“Ha’u mai hanesan vizita traballu hodi fahe informasaun kona-ba polítika IX Governu konstituisionál liga ho dezenvolvimentu ekónomiku, haree parseiru CCI importante ita hahú hala’o diálogu,” Ministru Komérsiu Indústria ne’e hateten ba jornalista sira iha salaun Otél Joya, Camanasa, sábadu ne’e.
Governante ne’e hateten, nia parte hala’o diálogu dahuluk ho setór privadu iha munisípiu Covalima atu rona setór privadu durante hala’o servisu no setór privadu sira hasoru dezafiu.
“Ita hanoin tenke hahú diálogu permanente ho setór privadu sira iha hahú iha munisípiu Covalima hodi rona servisu ne’ebé la’o ona hasoru dezafiu no problema ne’ebé ita-nia nasaun enfrenta. Merkadu fronteira ita-nia lei difikulta ita-nia atividade komersiál no kontrolu atividade komersiál ne’ebé la’o,” nia dehan.
Iha diálogu ne’e, CCI hato’o rekomendasaun ba Governu kona-ba merkadu fronteira no merkadu rejionál, atividade negosiánte hosi vendedór no atividade komersiál ilegál ne’ebé la’o foin lalais prende kamioneta rua ne’ebé sidadaun estranjeiru hala’o prátika atividade komersiál ho illegal no oinsá atu haree no mós regulamentu sira.
“Rekomendasaun ne’ebé hato’o hosi CCI Covalima, Governante ne’e konsidera tanba rekomendasaun pertinente tebes. Ami hato’o agradesimentu, ami akomoda informasaun depois polítika di’ak-liu tuir nesesidade ministériu hodi hametin ita-nia ekonómia,” nia dehan.
Rekomendasaun ne’ebé hato’o hosi CCI Covalim ne’e presiza atu haree no asegura hodi tau iha polítika nasionál bele fó solusaun ba problema hotu nasaun enfrenta, oinsá diversifika ekonómia hanesan identifika ponténsia ekonómiku bele kondis ho planu Governu hodi redús númeru dezempregu iha Timor-Leste.
Prezidente CCI Covalima, José do Rego Carvalho, hato’o agradesimentu ba Ministru Komérsiu Indústria ne’ebé pronrtu atu hala’o diálogu ho setór privadu sira iha Covalima.
“Ami CCI Covalima hato’o agardesimentu no rekomendasaun hanesan atu konstrui merkadu fronteira, merkadu rejionál Suai no atu kria armajen iha fronteira atu evita hatama sasán illegal,” nia hateten.
Razaun estabelese armajen iha fronteira atu bele iha sistema kontrolu ne’ebé di’ak, nune’e bele fó benefisiu ba empreza lokál sira.
Jornalista : Celestina Teles
Editór : Cancio Ximenes
