PM Xanana reune ho Prezidente Xina Xi Jinping
DILI, 23 setembru 2023(TATOLI) – Primeiru-Ministru, Kay Rala Xanana Gusmão enkontru bilaterál ho Prezidente Repúblika Populár Xina, Xi Jinping ho objetivu atu hametin kooperasaun entre nasaun rua.
Primeiru-Ministru agradese ba Estadu Xina ne’ebé desde tempu rezisténsia to’o independénsia apoia prosesu kontrusaun Estadu no nasaun Timor-Leste.
“Xina la’os primeiraves hatene kona-ba independénsia Timor -Leste nian, maibé Xina sempre apoiu boot Timor-Leste durante iha situasaun ne’ebé difisil iha funu naruk nian, ida ne’e importante tebes, depois manan tiha funu, primeiru estabelese kooperasaun diplomátika ne’ebé difisil tebes, tanba funu foin remata iha tinan 24, maibé atu informa katak Xina sempre iha ami nia fuan no agradese mòs ba oportunidade ida ne’e señor prezidente”, dehan PM Xanana durante enkontru bilaterál ho PR Xi Jinping iha sidade Hangzhou Repúblika Popular Xina liuhosi komunikadu ne’ebé Agência TATOLI asesu, ohin.
PM hateten, interesante tebes hodi hasoru Xefe Estadu Xina hodi troka opiniaun kona-ba relasaun bilaterál no mós kestaun nasionál no rejionál ne’ebé sai interese komum.
Xanana fó lembra katak iha 2014 hasoru Prezidente Xi Jinping hodi asina akordu kooperasaun rai rua nu’udar momentu ne’ebé sai meiu importante ba amizade entre nasaun rua.
“Dezde ita asina parseria bilaterál iha tinan 2014, ne’ebé abranje amizade, ita iha viziñu di’ak no relasaun bilaterál haklean. Timor -Leste kontinua apoia programa “Bealt and Road” hanesan inisiativa di’ak liu atu responde ba nesesidade infraestrutuas iha ita-nia rejiaun”, Xanana rekorda.
Timor-Leste asume hela atu hametin liután relasaun bilaterál ba parseira estratéjika ida ne’ebé mak luan liu. Timor-Leste mós hein katak sei aumenta kooperasaun iha área oioin hodi permite atu kontribui ba estabilidade no dezenvolvimentu rejionál no globál.
Ho enkontru ne’e, Timor- Leste hein katak atu asina planu kooperasaun entre Governo Repúblika Popular Xina no Governo-RDTL kona-ba promosaun konjunta ba inisiativa “Bealt and Raoad” hodi hametin no promove kooperasaun ida ne’ebe mak kualidade aas liu. Tanba akordu kooperasaun ne’e foka ba área haat mak revitalizasaun Indústria, dezenvolvimentu infraestruturas, autosufisiénsia alimentár no hadi’ak meiu susbsisténsia.
Parte seluk, Timor-Leste agradese mós ba Xina ninia apoiu durante pandemia COVID ne’ebé disponibiliza aimoruk vasina sinovak no ekipamentu hodi tulun povu Timor-Leste nia luta hasoru moras ne’e.
Iha fatin hanesan, Prezidente Repúblika Populár Xina, Xi Jimping agradese no parebeniza Primeiru-Ministru Xanana no Prezidente Repúblika, José Ramos-Horta ne’ebé kontinua hetan fiar hosi povu Timor-Leste hodi kaer hikas ukun.
Prezidente Xi Jinping konsidera vizita PM Xanana ne’e sei hametin liután lasu kooperasaun bilaterál entre rai rua ne’ebé estabelese durante ne’e.
“Benvindu Primeiru-Ministru Xanana ne’ebé hetan fila fali fiar hosi povu hodi kaer hikas ukun. Ba oin Xina nafatin iha kooperasaun di’ak atu apoiu nafatin Timor-Leste”, Xi Jinping dehan.
Xefe Estadu garante katak Xina sei apoia nafatin Governu Timor-Leste hodi avansa ba dezenvolvimentu ida ne’ebé prosperu no moris iha dame nia laran.
Jornalista : Hortencio Sanches
Editór : Zezito Silva
