Organizasaun Aikido abertura estabelese sentru formasaun iha Tilomar
COVALIMA, 24 setembru 2023 (TATOLI) – Organizasaun Ferderasaun Aikodi, sábadu ne’e, hala’o abertura hodi estabelese sentru formasaun ba membru Aikilo, iha postu administrativu Tilomar, munisípiu Covalima.
“ Ami mai iha-ne’e atu deklara estabelese sentru formasaun Aikido tanba iha treinadór na’in-ida ho naran Julião, ne’ebé nia rasik foti sintu metan iha Japaun nune’e ami hamutuk hodi estabelese tán sentru formasaum organizasaun aikido iha postu administrativu Tilomar,” Sekretáriu Jerál organizasaun Aikido, Francisco Barros ko’alia iha Tilomar.
Membru organizasaun Aikodi ladún barak ne’ebé nia konsentra de’it iha Dili, maibé foin mak estabelese sentru formasaun, iha Covalima nune’e ba futuru estabelese iha munisípiu hotu tanba organizasaun ne’e rejista iha komite olímpiku, KRAM no Ministériu justisa (MJ).
Organizasaun Federasaun Aikido hanesan organizasaun desportu loke ba ema hotu ne’ebé iha nia moto hanorin ema ba dame, pás no unidade oinsa moris iha komunidade nia leet.
Organizasaun Aikodo hahú harii iha tinan 2003 ne’ebé ho nia membru na’in 500-resin konsentra iha Dili no organizasaun ida-ne’e hetan fiar husi Governu hodi fó formasaun ba polísia akadémiku hodi halo defeza pesoál.
Organizasaun Aikido federasaun internasionál husi Japaun ne’ebé nia ramu iha Timor-Leste desportu arte marsiál mundiál
Unidade Servisu Ministériu Juventude Arte no Kultura (MJDAK), postu Tilomar, José Quintão Amarál, hato’o parabens ba organizasaun Aikido ne’ebé estabelese tan ona sentru formasaun iha postu Administrativu Tilomar.
“ Ami-nia parabéns ba organizasaun Aikido ne’ebé estabele ona sentru formasaun iha postu administrativu Tilomar,” nia informa.
ho nune’e Unidade Servisu MJDAK Tilomar , nia mós husu ba organizasaun Aikido servisu hamutuk Ministériu Juventude Arte no Kultura (MJDAK) no entidade hotu bele habelár organizasaun no transforma alin-sira sai modalidade desportivu hodi promove iha nivél nasionál to’o Internasionál.
Reprezentante Komandante Eskuadra Tilomar, Arcanjo Doutél Sarmento, reforsa, parte seguransa prontu atu fó apoia iha área seguransa nian ba joven sira ne’ebé tuir formasaun Aikido.
“Ami-nia kbiit tomak hodi fó seguransa ba alin sira-ne’ebé hala’o treinu iha sentru ida-ne’e, ami agradese tebes no ami prontu atu fó seguransa ba ita-boot sira,” nia hateten.
Tuir dadus membru organizasaun Aikido iha postu administrativu Tilomar, munisípiu Covalima hamutuk na’in-70 resin ne’ebé labarik ho idade tinan-7 to’o adultu.
Jornalista: Celestina Teles
Editór: Evaristo Soares
