DILI, 25 setembru 2023 (TATOLI)–Governu liuhosi Ministru Obra Públika, Samuel Marçal, segunda ne’e, fó pose ba Ana Paula da Cruz hodi troka Ermenegilda da Costa Laurentina, hanesan Prezidente Konsellu Administrasaun Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI, I.P), ba mandatu tinan-tolu, hahú tinan 2023 to’o 2026.
Biban ne’e, Ministru Obra Públika husu ba Prezidente foun atu koopera di’ak ho estrutura IGEADI sesante tanba mesak timor-oan de’it, ne’ebé hotu-hotu hamutuk fó liman ba malu hodi serbí nasaun di’ak liu.
“Iha instituisaun ida dala ruma ita hili líder ida ema balun kontente balun la kontente no balun gosta balun la gosta, maibé ida-ne’e dinámika organizasaun, ne’e normál. Ha’u ema foun, tanba ne’e ha’u seidauk koñese imi ida-idak, maibé ha’u koñese imi-nia serbisu iha terrenu ho valór boot tebtebes, imi hatudu duni vontade serbí ba ita-nia rain,” Samuel Marçal, hateten iha ámbitu tomada pose, iha edifísiu IGEADI, Colmera.
Ministru Obra Públika hasai despaixu ida ho númeru 418/MOP/2023, 19 setembru sobre ezonerasaun no nomeasaun ba membru Konsellu Administrasaun IGEADE, I.P. Despaixu ne’e publika iha Jornál Repúblika iha loron 19 setembru 2023.
MOP deside ezonerasaun no nomeasaun bazeia ba estatutu IGEADI númeru 1 artigu 10 no númeru 1 artigu 11, hodi ezonera kargu vogál Konsellu Administrasaun Abrão Pereira no José Diamantino de Oliveira, enkuantu Ermenegilda da Costa Laurentina nia mandatu ramata iha setembru 2023 no la hetan extensaun mandatu. Nune’e, nomea fali Prezidente Konsellu Administrasaun IGEADI, I.P foun, Ana Paula da Cruz, no nomea Almérico Caeiro Alves no Adelina de Jesus nu’udar vogál.
Notísia relevante : Governu nomea Ermenegilda da Costa lidera IGE
Ministru Samuel apresia no ondra ba Prezidente sesante ne’ebé durante ne’e hanesan feto ida, hasoru situasaun ida susar ho funsionáriu 200-resin, ho ida-idak ninia hakarak, hanoin, karater, no kultura ne’ebé la hanensa.
“IGIADE instituisaun ida importante tebes, ha’u husu ita hotu serbisu maka’as, fó laran ba malu no unidade hodi ita hotu serbí ita-nia rain no povu. Husu ba Prezidente foun ho estrutura atu labele halo mudansa tun sa’e ba buat ne’ebé mak di’ak ona, iha ita-nia Estadu ita hotu kompreende katak ita iha faze konstrusaun Estadu, katak ita foin harii Estadu, dala ruma falla no tenke troka, ne’e normál maibé labele hanoin atu muda hotu, kuandu halo hanesan ne’e ita lahalo serbisu, ita hanoin mak muda ba muda mai,” nia akresenta.
Iha biban hanesan, Prezidente Konsellu Administrasaun IGEADI, I.P, Ana Paula da Cruz, kompromete sei serbisu ho di’ak durante mandatu.
“Ha’u la’ós ema foun, ha’u durante ne’e serbisu nanis hela iha IGEADE. Oportunidade ida-ne’e ha’u hanoin ha’u tenke uza ho di’ak, serbisu ne’ebé mak antes iha ona ha’u sei kontinua, ida ne’ebé mak presiza atu hadi’a tenke hadi’a, maibé ha’u husu atu funsionáriu ajuda hodi ita bele halo serbisu di’ak liu,” nia tenik.
Ana Paula dehan, IGEADI ninia serbisu laiha feriadu tanba atendimentu direta ba komunidade, hanesan akontese inundasaun iha loron ka kalan nafatin serbisu.
“Tanba ne’e ha’u husu atu ita hotu, liu-liu tékniku sira atu kuidadu saúde,” nia adianta.
Biban ne’e, Prezidente Konsellu Administrasaun IGEADI sesante, Ermenegilda da Costa Laurentina entrega relatóriu durante mandatu ba Prezidente foun.
IGEADI hanesan instituisaun ida atu garante utilizasaun efisiente ba mákina pezada, ekipamentu no veíkulu pezadu. Governu deside kria IGE (atuál IGEADI) iha tinan 2005 hanesan institutu públiku ho autonomia administrativa, finanseira no patrimóniu própriu ne’ebé responsável ba boa jestaun no esplorasaun ba bens iha ámbitu prosekusaun dezenvolvimentu infraestrutura no nesesidade ba servisu administrasau públika.
Antes ne’e, iha loron 09 setembru 2023, Konsellu Ministru aprova ona projetu kona-ba Rezolusaun Governu, ne’ebé aprezenta hosi Ministru Obra Públika, kona-ba ezonerasaun José Luís de Carvalho no nomea hikas Ermenegilda da Costa Laurentina ba kargu Prezidente Konsellu Administrasaun IGE foun ba mandatu tinan-tolu, hahú 2020 to’o 2023.
Jornalista : Antónia Gusmão
Editora : Julia Chatarina
